Ինչպէս ծանօթ է մեր համայնքի անդամներուն, Ս. Փրկիչ Ազգային Հիւանդանոցի ու Գարակէօզեան Տան միջեւ վերջերս տարակարծութիւն մը գոյացած է կալուածի մը վերաբերեալ։ Սոյն հարցով, Նորին Ամենապատուութիւնը անցեալ շաբթուան ընթացքին հանդիպումներ ու գաղափարի փոխանակումներ ունեցած է երկու կողմերուն հետ եւ բերած՝ իր հայրական թելադրութիւնները։

Ամենապատիւ Պատրիարք Սրբազան Հայրը այս առթիւ հրաւէր ուղղած է կողմերուն, որպէսզի անոնք Պատրիարքարանի մէջ հանդիպին իրարու հետ 28 Հոկտեմբեր 2020, չորեքշաբթի, ժամը 16.00ին եւ սատարեն հարցին բարւոք լուծման։