Թուրքիան ու Միացեալ Նահանգները կ՛աջակցին Ազրպէյճանի եւ Հայաստանի միջեւ խաղաղ հոլովոյթին, ինչպէս նաեւ բոլոր ջանքերը կը գործադրեն Կովկասի եւ Սեւ Ծովու մէջ լարուածութեան սրման վտանգները նուազեցնելու համար: Այս մասին Նիւ Եորքի մէջ «Թուրք-ամերիկեան յարաբերութիւնները 100-ամեակի շեմին» կլոր սեղանի նիստի ընթացքին յայտարարած է Թուրքիոյ արտաքին գործոց նախարար Հաքան Ֆիտան: Այս մասին կը հաղորդեն ազրպէյճանական լրատուամիջոցները:

Ֆիտան իր խօսքին մէջ ընդգծած է Անգարայի եւ Ուաշինկթընի համագործակցութեան կարեւորութիւնը համաշխարհային խաղաղութեան եւ կայունութեան պահպանման համար: Ան աւելցուցած է, որ երկու երկիրներու գործընկերութիւնը նոր կարելիութիւններ կը ստեղծէ շրջանի զարգացման եւ խաղաղութեան պահպանման համար:

Թրքական դիւանագիտութեան պետը նաեւ նշած է, որ Սեւծովեան շրջանը պէտք չէ վերածուի խնդիրներու աղբիւրներու, այլ պէտք է դառնայ միջազգային համագործակցութեան հարթակ:

Անդրադառնալով ռուս-ուքրանական հակամարտութեան կարգաւորման` ան նշած է, որ Անգարան կը շարունակէ գործօն կերպով աջակցիլ թէ՛ Քիեւի, թէ՛ Մոսկուայի հետ հաղորդակցութիւններուն: «Մենք կ՛աջակցինք երկխօսութեան եւ դիւանագիտութեան` Ուքրանիոյ մէջ կայուն խաղաղութեան հասնելու համար», նշած է նախարարը:

Ֆիտան ընդգծած է, որ ներկայ աշխարհաքաղաքական փոփոխութիւններու լոյսին տակ անհրաժեշտ է արդիւնաւէտ հոլովոյթի ձեւաւորում համաշխարհային տէրութիւններու եւ յառաջատար շրջանային դերակատարներու միջեւ: