Ազրպէյճան պատրաստ է Հայաստանի հետ բանակցութիւններու առաջին փուլին սկսելու: Ազրպէյճանական «Մինվալ» կայքը կը հաղորդէ, որ այս մասին «Հարաւային Կովկաս. զարգացում եւ համագործակցութիւն» նիւթով միջազգային խորհրդաժողովի ընթացքին յայտարարած է Ազրպէյճանի արտաքին գործոց նախարար Ճէյհուն Պայրամով:

«Մեր յոյսերը լաւատեսական են, լաւ արդիւնքի յոյս ունինք: Եթէ համեմատենք ներկայ եւ մէկ տարի առաջուան մթնոլորտը, ապա դրական տեղաշարժեր կը տեսնենք», ըսած է Պայրամով` աւելցնելով. «Հայկական կողմը միշտ չէ, որ իր դիրքորոշումին կայունութեամբ աչքի կը զարնէ»: