Մաքուր Տունը` «Քորոնա» Վարակէն Խուսափելու Միջոցներէն Մէկը

Մահացու վտանգ պարունակող «Քորոնա» վարակը դարձած է ամբողջ աշխարհի սարսափը, սակայն անկէ կարելի է փրկուիլ, եթէ ճիշդ հետեւինք մաքրութեան որոշ կանոններու:

Պաշտպանիչ դիմակ կրելէ, յաճախ ձեռքերը օճառելէ եւ հեռաւորութիւն պահելէ բացի, մաքուր բնակարանը վարակէն խուսափելու լաւագոյն միջոցներէն մէկն է:

Ստորեւ կը ներկայացնենք տունը մաքրելու քանի մը խորհուրդ, որոնք կ՛օգնեն ձեզ եւ ձեր մտերիմները` պաշտպանելու այս վտանգաւոր վարակէն:

– Մասնագէտները կը թելադրեն ներքնազգեստները, սրբիչները, սաւանեղէնն ու ցամքոցները լուալ 60 ջերմաստիճանով:

Անոնց կարծիքով` շուկայէն, հանրախանութէն եւ նման վայրերէ վերադարձին հագուստները պէտք է անմիջապէս հանել եւ լուացքի դնել: Իսկ լուացքը չորցնել բացօթեայ` արեւի ճառագայթներուն պարզելով:

– Տուն վերադարձին կօշիկները պէտք է հանել տան մուտքին, հագնիլ մուճակները եւ այդպէս շրջիլ տան մէջ: Այս միջոցը եւս կ՛օգնէ, որ մանրէները տան մէջ չտարածուին:

– Գիտնականները կը պնդեն, որ «Քորոնա» վարակը չժանգոտող մետաղի, ապակիի եւ «փլասթիք»-ի վրայ կրնան ապրիլ ընդամէնը 5 օր: Անոնք խորհուրդ կու տան պնակեղէններն ու կաթսաները լուալ շատ տաք ջուրով:

– Հեռակառավարման վահանակը սովորաբար ձեռքէ-ձեռք կ՛անցնի, այդ պատճառով ալ պէտք է տեւաբար մաքրել ու հականեխել զայն: Մաքրելու համար կարելի է օգտագործել քացախի մէջ թրջուած մաքուր լաթ մը:

– Երեխաներուն մօտ վարակը կրնայ տարածուիլ խաղալիքներու միջոցով: Ամուր, կարծր խաղալիքները կարելի է լուալ խոշոր տաշտի մէջ կամ պնակ լուացող մեքենայի մէջ, իսկ փափուկները` լուացքի մեքենայի մէջ, միշտ` 60 ջերմաստիճանով:

– Մասնագէտներու կարծիքով` դռներու բռնակներուն վրայ վարակը կրնայ ապրիլ մինչեւ 9 օր, հետեւաբար շատ կարեւոր է զանոնք յաճախ մաքրելն ու հականեխելը: Հոս եւս քացախը ազդու, ոչ քիմիական միջոց է:

– Թղթադրամներն ու մանրադրամները մանրէի բոյն են, անոնք ձեռքէ-ձեռք անցնելով վարակը կրնան փոխադրել շատ արագ: Եթէ կարելի է ձեր վճառումները կատարեցէ՛ք անհպում միջոցով, այլապէս` մշտապէս հականեխեցէ՛ք ձեր ձեռքերը:

– Եւ վերջապէս` դուրսէն տուն բերուած որեւէ ապրանք (պտուղ, բանջարեղէն, պահածոյի տուփեր, ջուրի կամ զովացուցիչի շիշեր եւ այլն…) նախքան սառնարանին կամ պահարանին մէջ զետեղելը պէտք է բծախնդրօրէն մաքրել, լուալ…