Այլեւայլ : Սննդագիտական. Ստեպղին Ուտելու Համոզիչ Պատճառներ
Սննդագիտական. Ստեպղին Ուտելու Համոզիչ Պատճառներ
Գետնախնձորի կողքին, ստեպղինը ամենատարածուած եւ օգտագործուած բանջարեղէնն է աշխարհի բոլոր խոհանոցներուն մէջ: Անոր հայրենիքը կեդրոնական Ասիան է, բայց ներկայիս զայն կը մշակեն գրեթէ բոլոր երկիրներուն մէջ: Անոր համն ու բազմակի օգտագործումը զայն դարձուցած են էական բաղադրիչը հարիւրաւոր բաղադրատոմսերու:
Ինչ կը վերաբերի ստեպղինի սննդական արժէքին, յիշենք, որ ան հարուստ է Ա. կենսանիւթով, կը պարունակէ նաեւ Պէ.6, Սէ. կենսանիւթեր, ֆոլաթթու, երկաթ, մանկանեզ, փոթասիոմ, պղինձ…
Ստորեւ կը ներկայացնենք ստեպղին ուտելու համոզիչ պատճառներ:
Ստեպղինը կը կանխարգիլէ քաղցկեղի յառաջացումը, անոր յաճախակի օգտագործումը կը նուազեցնէ թոքերու, կաթնագեղձի եւ հաստ աղիքի քաղցկեղի յառաջացման հաւանականութիւնը:
Ստեպղինը կը պարունակէ հզօր հակաօքսիտան` պեթա քարոթենը, որ կը կանխարգիլէ բջիջներու ծերացումը:
Ա. կենսանիւթը կը կանխարգիլէ ժամանակէն առաջ յայտնուող կնճիռները, մաշկի չորութիւնը եւ խամրած գոյնը:
Ստեպղինը կը պահպանէ եւ կը բարելաւէ տեսողութիւնը եւ կը պաշտպանէ տարիքի հետ կապուած աչքի հիւանդութիւններէն:
Ստեպղինի յաճախակի օգտագործումը կը նուազեցնէ գէշ քոլեսթերոլի տոկոսը եւ մեզ կը պաշտպանէ սրտանօթային հիւանդութիւններէն:
Ստեպղինին պարունակած կենսանիւթերը, հակաօքսիտաններն ու բնաթելերը եւ քիչ ջերմուժ պարունակելու անոր առաւելութիւնները զայն կը դարձնեն յարմար ուտելիք մը` բոլոր անոնց համար, որոնք նիհարնալու սննդականոնի կը հետեւին:
Ստեպղինի Բարիքներէն Օգտուելու Համար…
Ստեպղինի բարիքներէն օգտուելու համար կարելի է զայն օգտագործել կերակուրներու, աղցաններու, ապուրներու եւ մինչեւ իսկ աղանդերներու պատրաստութեան մէջ:
Յանձնարարելի է նաեւ օրական բաժակ մը ստեպղինի հիւթ խմել` անոր անհամար բարիքներէն օգտուելու համար:
Որպէս Դէմքի Ծեփուկ
Առէք երկու միջակ ստեպղին, լուացէք եւ առանց կեղուելու` հարիչէ անցուցէք: Ստացուած խիւսին թէյի դգալ մը մեղր աւելցուցէք եւ լաւ խառնելէ ետք ծեփուկը տարածեցէք ձեր մաքուր մաշկին վրայ: 20 վայրկեան ետք գաղջ ջուրով ցօղուեցէք ձեր դէմքը:
Այս ծեփուկը կարճ ժամանակի ընթացքին ոչ միայն պիտի սնուցանէ ձեր դէմքին մորթը, այլեւ առողջ տեսք, ողորկ ու փայլուն մաշկ ու գեղեցիկ գոյն պիտի ապահովէ ձեր յոգնած ու խամրած մաշկին:
Yazarlar Tüm Yazarlar
Anket Tüm Anketler
Günün Sözü
Ամէն ինչէն միշտ դժգոհ ըլլալը ահաւոր հիւանդութիւն մըն է։