Շուշի քաղաքին մէջ ամբողջ օրուան ընթացքին մարտական գործողութիւնները շարունակուած են: «Երկիր Մետիա» պատկերասփիւռի կայանին տուած հարցազրոյցի մը ընթացքին այս մասին ըսած է Արցախի Հանրապետութեան Ազգային ժողովի պատգամաւոր, ՀՅԴ Արցախի Կեդրոնական կոմիտէի ներկայացուցիչ Դաւիթ Իշխանեանը:

«Ամբողջ օրուան ընթացքին ռազմական գործողութիւնները շարունակուած են, դժուար է այս պահուն ընդհանուր գնահատական տալ: Եթէ պաշտպանութեան բանակը համապատասխան հաստատումներ չի կատարեր, կը կարծեմ, որ քաղաքական իշխանութիւններուն տեսակէտը ինչ որ տեղ պէտք է կասկածի տակ առնել եւ տուրք չտալ այդ բոլորին: Ի վերջոյ, բանակը ունի իր խնդիրները եւ բանակը իր խնդիրները կը կատարէ», նշած է Իշխանեան:

Արցախի Հանրապետութեան Ազգային ժողովի ներկայացուցիչը նշած է, որ շատ կարեւոր է հետեւիլ պաշտպանութեան բանակի լրատուական ծառայութեան հրապարակումներուն եւ ամբողջական տեղեկատուութիւնը ստանալ մէկ տեղէ: