Հռոմէական Կաթոլիկ եկեղեցին յառաջ կը տանի պատրաստութիւններ՝ նոր քահանայապետի ընտրութեան համար։ Քոնքլաւը՝ պապընտիր ժողովը պիտի գումարուի յառաջիկայ շաբթուան մէջ՝ մայիսի 7-ին։ Վատիկանի Սիստինեան մատրան տանիքին երէկ զետեղուեցաւ այն ծխնելոյզը, որու սպիտակ ծուխը պիտի ազդարարէ Սուրբ Աթոռի նոր գահակալի ընտրութիւնը։

Նոր պապը ընտրելու համար գումարուելիք Քոնքլաւին 133 կարտինալ պիտի մասնակցի։ Միքելանճելոյի յայտնի որմնանկարներուն ներքեւ, Վատիկանի Առաքելական պալատէն ներս հաստատուած 15-րդ դարու այս մատրան մէջ անոնք պիտի ընտրեն Սուրբ Աթոռի յաջորդ գահակալը։ Հնգօրեայ ժամկէտ մը կ՚ենթադրուի Քոնքլաւի համար, որ կը գումարուի դռնփակ։

Միջազգային մամուլին մէջ կը նշուին զանազան կարտինալներու անունները՝ որպէս Կաթոլիկ եկեղեցւոյ նոր հովուապետի թեկնածու։ Յամենայնդէպս, բոլոր հարթութիւններու վրայ կը նշուի, որ արդիւնքը միշտ անակնկալներու բաց կ՚ըլլայ։