Թուրքիոյ նախագահ Ռեճեփ Թայիփ Էրտողան 22 սեպտեմբերին բանակցած է Գերմանիոյ վարչապետ Անկելա Մերքելի եւ Եւրոպական խորհուրդի նախագահ Շարլ Միշելի հետ: «Անատոլու» լրատու գործակալութիւնը կը հաղորդէ, որ եռակողմ հանդիպումը տեղի ունեցած է տեսաժողովի ձեւաչափով:

Հանդիպումի ընթացքին կողմերը քննարկած են Միջերկրական ծովու արեւելքին մէջ տիրող իրավիճակն ու Թուրքիա-Եւրոպական Միութիւն յարաբերութիւնները:

Բանակցութիւններու ընթացքին ընդգծուած է Աթէնքի եւ Անգարայի պատրաստակամութիւնը արեւելեան Միջերկրականի մէջ գոյութիւն ունեցող լարուածութեան նուազեցման ուղղուած նախնական բանակցութիւններու սկսելու վերաբերեալ:

Թուրքիոյ նախագահը յոյս յայտնած է, որ արեւելեան Միջերկրականի շրջանային խորհրդաժողովը, որուն պիտի մասնակցին բոլոր կողմերը, ներառեալ` կիպրացի թուրքերը, կ՛աւարտի կառուցողական որոշումներու որդեգրումով: