Իրանի պաշտպանութեան նախարար զօր. Ամիր Հաթամի Լեռնային Ղարաբաղի տագնապի գօտիին մէջ պատերազմող կողմերուն զգուշացուցած է, որ աւելի կտրուկ քայլերու պիտի ձեռնարկեն, եթէ հրետակոծութեան ժամանակ ռումբերը դարձեալ իյնան Իրանի տարածքին մէջ: Այս մասին կը հաղորդէ «Թասնիմ» կայքը:

Լրատուամիջոցներու հետ զրոյցի ընթացքին զօրավարը նշած է, որ Իրանի զինեալ ուժերուն համար երկրի սահմանային անվտանգութիւնը կարեւորագոյն նշանակութիւն ունի` աւելցնելով, որ Հայաստանին ու Ազրպէյճանին արդէն այս առնչութեամբ «լուրջ զգուշացումներ» կատարուած են:

«Իրանի քաղաքայիններու կեանքը եւ սուրբ հողի անվտանգութիւնը կենսական ու կարեւոր հարցեր են, ուստի` անզգուշութեան պատճառով փամփուշտներու` մեր տարածքին մէջ յայտնուիլը անթոյլատրելի է», ընդգծած է Հաթամի եւ սպառնացած միջադէպերու կրկնուելու պարագային «առաւել լուրջ միջոցներու» ձեռնարկել: