Կապոյտ երազ - Kitap Köşesi
25 Mayıs 2022 - Հակական տոմար - Տարի : 4514 / Ամիս : Մարերի / Օր : Ցրօն / Ժամ : Հոթապեալ

Kitap Köşesi :

17 Şubat 2022  

Կապոյտ երազ -

Կապոյտ երազ «Կապոյտ երազ», որ կողքի մը տակ կը խմբէ ստանպուլահայ գրողներու ծովու, կղզիի, նաւու ու նաւամատոյցի վերաբերող պատմուածքները

«Կապոյտ երազ», որ կողքի մը տակ կը խմբէ ստանպուլահայ գրողներու ծովու, կղզիի, նաւու ու նաւամատոյցի վերաբերող պատմուածքները, գրականութեան բաւիղներուն մէջ կը հետապնդէ Պոլսոյ ու պոլսեցիներու այս մեծ սիրոյն հետքերը։ Հայ գրականութեան ծալքերէն ներս բանասէր Սեւան Տէյիրմենճեանի կատարած մանրակրկիտ աշխատութեամբ ի յայտ եկած այս հատընտիրը կը ներկայացնէ Զաւէն Պիպեռեանէ Յակոբ Մնձուրի, Երուանդ Կոպէլեանէ Վարդան Կոմիկեան, Սոնա Տէր Մարգարեանէ Սեդա Թեւեան մէկը միւսէն արժէքաւոր տասնինը հեղինակէ պատմուածքներ՝ ի մասին քաղաքի, ծովու, ծովեզերքի, Ստանպուլի կեանքի ու հարկաւ այս գեղեցիկ քաղաքի բնակիչներուն։

Հնագոյն Կոստանդնուպոլսոյ, ինչպէս հայերը կ՚անուանեն Պոլսոյ ու վերջապէս Ստանպուլի բազկերակը գրողի զգայնութեամբ գրի առած այս անունները կ՚արձանագրեն տեղի ունեցած փոփոխութիւնները, կորուստներն ու նորութիւնները՝ միաժամանակ ճոխացնելով Ստանպուլի զգացումներու աշխարհագրութիւնը։ «Կապոյտ երազ» կը խոստանայ ընթերցանութեան անյագուրդ ախորժակ մը, միւս կողմէ մատուցելով արժանին Պոլսոյ ծովերուն, որ անկասկած միլիոնաւորներու հասարակաց կապոյտ երազն է։ «Կապոյտ երազ» գովք մըն է մեր իսկ ձեռքով բրտօրէն դէպի ոչնչացում թալաւող պատմական քաղաքին, իր մշակոյթին ու բնակիչներուն…

Մեր երիտասարդութեան տարիներուն կը զուգադիպէին այդ օրերը: Կիրակնօրեայ արձակուրդին յատկացուած եւ ծիծաղելի նկատուելու չափ ճղճիմ գումարին կարեւոր մէկ մասը կ’առնէր սակայն դարձեալ փոխարժէքը առաջին այդ շոգենաւի տոմսակին, գրեթէ մեր բոլոր ընկերներուն համար, քանի որ օրուան պայմանները անկարելի դարձուցած էին մեզմէ շատերուն շարունակել ուսումը եւ կիրակի օրերն ալ իբրեւ ուսանող զեղչեալ գինով ճամբորդել՝ դէպի կղզիներ:

Տարօրինակ է սակայն. հակառակ անոր որ այդ տոմսակը կը տանէր մեծ մասը մեր կիրակնօրեայ յատկացումներուն, մնացեալով կրկին ահագին գործ կը տեսնէինք, բնականաբար առաւելագոյն խնայողութեամբ, եւ իրիկունը տուն կը վերադառնայինք իսկապէս բաւարարուած, երջանիկ օր մը անցուցած ըլլալու գոհունակութեամբ:

Այդ զեղչեալ սակացոյցի դրութիւնը շարունակուեցաւ պատերազմէն վերջ ալ, եթէ չեմ սխալիր, քանի մը տարի եւս: Յիշողութիւնը կամաց-կամաց կը սկսի արդէն իսկ ջնջել հետքերը անոնց ալ՝ բոլորին նման, ինչպէս շատեր կը դժուարանան այսօր յիշել եօթը երեսունի շոգենաւն անգամ:

«Բաժակ մը վճիտ ջուրի պէս»

Երուանդ Կոպէլեան




Սեռ՝ Պատմուածք
Լեզուն՝ Հայերէն
Խմբագիր՝ Սեւան Տէյիրմենճեան
Կողքի ձեւաւորում՝ Մելիսա Արսէնեան
Տպագրութեան մասին՝ Ա տպագ., Յունուար 2022
Էջն ու չափերը՝ 384 էջ, 15x21 սմ
ISBN 9786257460040




Bu haber arasyayincilik kaynağından gelmektedir.

Haber metninde yer alan görüşler haber kaynağı (arasyayincilik) ve yazarına ait olup,
bolsohays.com sitesi haber hakkında herhangi bir görüş üstlenmemektedir.

Opinions expressed are those of the author(s)-(arasyayincilik). They do not purport to reflect the opinions or views of bolsohays.com
+