Յառաջիկային Ազգային ժողովի նստաշրջանի օրակարգին մէջ պիտի ընդգրկուի Հայաստանի եւ Միացեալ Նահանգներու միջեւ «Թրամփի ուղի` յանուն միջազգային խաղաղութեան եւ բարգաւաճման» նախագիծի (ԹՐԻՓՓ) վերաբերեալ ռազմավարական համագործակցութեան մասին շրջանակային համաձայնագիրը վաւերացնելու մասին» նախագիծը:

Անիկա նախ պիտի քննարկուի Ազգային ժողովի արտաքին յարաբերութիւններու յանձնախումբին մէջ` այս չորեքշաբթի: Ազգային ժողովի հերթական նիստերը պիտի սկսին յաջորդ երեքշաբթի` 27 հոկտեմբերին:

Աւելի կանուխ կառավարութիւնը հաստատած էր համաձայնագիրն ու ուղարկած Սահմանադրական դատարան, որ իր կարգին քանի մը ժամ քննելով որոշեց, որ փաստաթուղթը հակասութիւններ չունի Հայաստանի Սահմանադրութեան հետ:

Այս համաձայնագիրով Երեւանն ու Ուաշինկթընը կը նախատեսեն ԹՐԻՓՓ զարգացման միացեալ ձեռնարկութիւն ստեղծել, ուր Միացեալ Նահանգներու մասնաբաժինը առաջին 49 տարուան ընթացքին 74, Հայաստանինը` 26 տոկոս պիտի ըլլայ: Եթէ համագործակցութիւնը եւս 50 տարիով երկարաձգեն, Հայաստանի բաժնեմասը պիտի աւելնայ մինչեւ 49 տոկոս:

Սիւնիքով անցնող ԹՐԻՓՓ-ով Ազրպէյճանի հիմնական տարածքէն դէպի Նախիջեւան տարանցումը, ըստ համաձայնութիւններու, անխոչընդոտ պիտի ըլլայ` թուային գործիքներու ներդրումով: Երեւանն ու Ուաշինկթընը պարբերաբար կը շեշտեն, որ Հայաստան պիտի պահպանէ լիակատար իրաւազօրութիւնը իր ինքնիշխան տարածքին մէջ: