Թուրքիոյ նախագահ Ռեճեփ Թայիփ Էրտողան եւ Ազրպէյճանի նախագահ Իլհամ Ալիեւ երէկ Թուրքիա-Ազրպէյճան յարաբերութիւններու ամրութիւնը շեշտեցին երկու երկիրներուն միջեւ Ազրպէյճանի մէջ «լաչակի տագնապ» անունով ծանօթ լարուածութենէն երկու ամիս ետք Էրտողանի Արցախ այցելութեան ընթացքին:

Թուրքիոյ նախագահը իր ազրպէյճանցի պաշտօնակիցին հետ բռնագրաւուած Շուշիի մէջ միացեալ մամլոյ ասուլիսի մը ընթացքին յայտնեց. «Թուրքիոյ եւ Ազրպէյճանի միջեւ եղբայրական յարաբերութիւնները տկարացնելու փորձերը անցեալին չեն յաջողած, ապագային ալ պիտի չյաջողին»` նշելով, որ երկու երկիրներուն միջեւ յարաբերութիւնները պատմութեան ընթացքին շարք մը փորձութիւններէ անցած են եւ հասած իրենց այսօրուան յառաջադէմ մակարդակին:

Նշենք, որ Էրտողան Ազրպէյճան այցելեց Արցախի բռնագրաւման 6-ամեակի նշման համար:

Անոր կ՛ընկերակցէր իր կինը` Ամինէ Էրտողանը, արտաքին գործոց նախարար Հաքան Ֆիտանը, թրքական հետախուզութեան պետ Իպրահիմ Քալընը, նախագահական պալատի հաղորդակցութեան բաժանմունքի պետ Պուրհանէտտին Տուրանն ու շարք մը նախարարներ ու երեսփոխաններ:

Անդրադառնալով Շուշիի գրաւման` Էրտողան ըսաւ. «Ազրպէյճանի 44 օր տեւած պատերազմի ընթացքին իր հողերը ազատագրելը Հարաւային Կովկասի մէջ նոր փուլի ճամբան բացաւ»:

Ալիեւ իր կարգին ըսաւ. «Թուրքիոյ եւ Ազրպէյճանի միասնականութիւնը յաւիտենական է ու անսասան»` բարձր գնահատելով Արցախի կռիւներուն ընթացքին Թուրքիոյ իր երկրին տրամադրած աջակցութիւնը: