Աշխարհ, Հայաստան, ՍփիւռքԹուրքիոյ նախագահ Ռեճեփ Թայիփ Էրտողանի նախագահութեամբ կայացած խորհրդատուական բարձրագոյն կոմիտէի նիստին կայացուած է որոշում՝ ստեղծելու յատուկ մարմին մը, որ պիտի զբաղի Հայոց Ցեղասպանութեան հերքմամբ։ Այս մասին ԵՌԱԳՈՅՆ-ը կը տեղեկանայ Ermenihaber.am-էն, որ կը վկայակոչէ milliyet.com.tr-ը։

Էրտողանի հրահանգով՝ նոր կառոյցը պէտք է զբաղի Հայոց Ցեղասպանութեան թեմայով նոր մարտավարութեան մշակումով, ինչպէս նաեւ միջազգային հարթակներու վրայ այդ թեմային շուրջ տեղի ունեցող զարգացումներուն պատասխան քայլեր կազմելու գործառոյթով։

Համաձայն աղբիւրին՝ նման գաղափար ծագած էր դեռ 3 ամիս առաջ, երբ ԱՄՆ-ի քոնկրէսի օրակարգ բերուած էր Հայոց Ցեղասպանութեան բանաձեւը, իսկ ամերիկեան դատարաններու մէջ սկսած էին քննուիլ Թուրքիոյ դէմ հայերու ներկայացուցած հայցերը։

Նշեալ կոմիտէի նիստին ընդգծուած է, որ մինչ օրս չկայ մէկ միասնական մարմին, որ կը զբաղի Հայոց Ցեղասպանութեան հերքման ուղղուած փաստերու հաւաքմամբ եւ միասնական քաղաքականութեան մշակմամբ։ Էրտողանը հրահանգած է հնարաւորինս արագ աւարտել նախատեսուող կառոյցի ստեղծման աշխատանքները։