Ն.Ա.Տ. Սահակ Բ. Սրբազան Պատրիարք Հայրը շնորհաւորեց Սահակեան Նունեան Վարժարանի երբեմնի սաներէն Պերք Աճարը, որ պետական վերջին որոշմնագրով նշանակուած էր Տէնիզլիի Պապատաղ գաւառակի գաւառապետութեան պաշտօնին։

Նորին Ամենապատուոնւթիւնը իր շնորհաւորականին մէջ անդրադարձաւ թէ գաւառապետութեան քննութեան մէջ ձեռքբերած յաջողութիւնը ուրախութիւն պատճառած էր։ Իսկ այս անգամ գաւառապետութեան պաշտօնին նշանակումը ուրախութեան առընթեր, հպարտութեան առիթ ընծայած էր։ Այս նշանակումով կը յայտնուէր, թէ ենթակայի արժանաւորութիւնը կը գնահատուէր յաչս պետութեան։ Մեր Հոգեւոր Պետը յաջողութիւն մաղթեց իր նոր պաշտօնին մէջ եւ յայտնեց, թէ սրտանց կը հաւատար որ իր գիտութեամբ օգտակար պիտի հանդիսանար ընդհանրապէս երկրի հայրենակիցներուն եւ ի մասնաւորի Պապատաղի ժողովուրդին։