Ինչպէս ծանօթ է, «Լոյս մետիա»ի անունով, Յարութիւն Գուրանի արտադրութեամբ նկարահանուած էր «Ոսկեայ սիրտով ձեռնոց» վաւերագրական ժապաւէնը, նուիրուած՝ առասպելական կռփամարտիկ Կարպիս Զաքարեանին. ռինկի վրայ յամառ եւ առիւծասիրտ, իսկ ընդհանրապէս ոսկեայ սիրտով ու համեստ նկարագրի տէր անհատականութեան, որ կռփամարտի մարզաձեւին մէջ բազում յաղթանակներ կերտելով, բարձր պահեց պոլսահայութեան եւ Թուրքիոյ պատիւը, եղաւ տիպար հայրենակից, մարզիչ, ընտանիքի հայր եւ ամուսին, յիշարժան անուն մը թողլով իր ետին։

Ուրախութեամբ կը տեղեկացնենք որ ժապաւէնը ներառնուած է ԹՌԹի վաւերագրական ժապաւէններու միջազգային 14րդ փառատօնի ընտրանիին մէջ։ Ժապաւէնը այսօր, Շաբաթ, 16 Դեկտեմբերի ժամը 16.30ին, պիտի ցուցադրուի իշհէքանէի շարժանկարի համալիրի 5րդ սրահին մէջ։ Մուտքը անվճար է։