ՀՀ երկրորդ նախագահ Ռոբերտ Քոչարյանի կալանավորումն ունի ներքին և արտաքին հիմքեր։ Այս մասին Alpha News -ի եթերում հայտարարել է լրատվամիջոցի գլխավոր խմբագիր Տիգրան Քոչարյանը՝ ներկայացնելով իրավիճակի շուրջ իր վերլուծությունը։

Անդրադառնալով ներքին պատճառներին՝ նա նշել է, որ «թալանի վերադարձի» մասին իշխանական նարատիվը կեղծ է։

«Եթե իրոք թալան կար, 8 տարի ինչի՞ն էին սպասում: Փաշինյանը հասկանում է, որ արդար ճանապարհով այլևս չի ընտրվելու: Ուստի նա բռնապետություն է հաստատում՝ ասպարեզից հեռացնելով հիմնական հակառակորդներին: Սա Քոչարյանի արդեն 4-րդ կալանավորումն է, ինչն ապացուցում է, որ գործը շինծու է և բացարձակ քաղաքական»,-ասել է Alpha News-ի գլխավոր խմբագիրը:

Անդրադառնալով արտաքին գործոններին և աշխարհաքաղաքական զարգացումներին՝ Տիգրան Քոչարյանն ընդգծել է, որ կալանքը հստակ աշխարհաքաղաքական պահանջ է։

«Արևմուտքը պարտադրում է խզել կապերը ՌԴ-ի հետ՝ մեզ դարձնելով պոտենցիալ Ուկրաինա, բայց առանց Եվրոպայի հետ սահմանի: «Դեպի Եվրոպա» թեզն իրականում թուրք-ադրբեջանական օրակարգ է՝ Հայաստանը Ռուսաստանի հետ թշնամացնելու և մեր երկիրը «կուլ տալու» համար։

Առաջիկայում Փաշինյանը պետք է գնա հանրաքվեի՝ Սահմանադրությունը փոխելու և ազգային տարրերը հանելու նպատակով: Նա այժմ չեզոքացնում է այն լիդերներին, որոնք կարող են կոնսոլիդացիա ապահովել և տապալել Բաքվի հերթական պարտադրանքը»,- ասել է Տիգրան Քոչարյանը:

Նրա խոսքով՝ Բաքուն ամեն օր նոր պահանջներ է դնում՝ հողեր հանձնել, Սահմանադրություն փոխել։

«Չունենալով բավարար աջակցություն դա անելու համար՝ Փաշինյանը փորձում է սիրաշահել Ալիևին. «Տես, Սահմանադրությունը դեռ չեմ կարողանում փոխել, բայց փոխարենը Քոչարյանին կալանավորել եմ»: 2018-ին շատերը զգուշացնում էին՝ Քոչարյանին կալանավորում են Արցախն անխոչընդոտ հանձնելու համար, և ժամանակն ապացուցեց մեր ճշմարտացիությունը: Այսօր էլ պնդում եմ՝ սա արդարության կամ միլիոնների վերադարձի մասին չէ, Հայաստանին նոր ողբերգությունների ու մեծ փորձությունների են նախապատրաստում»,-նշել է Տիգրան Քոչարյանը: