Ամենայն հայոց Գարեգին Բ. կաթողիկոսին եւ միւս եպիսկոպոսներու դատը Արմաւիրի մարզի առաջին ատեանի դատարանի դատաւոր Սերժ Ռուշանեանը 28 օգոստոսին ուղարկեց Երեւանի դատարան:

Դատաւորը հաստատեց, որ չի խուսափիր այս գործը քննելէ, բայց, ըստ անոր, դատական իրաւասութեան խնդիր կայ: «Խնդիրն այն է, որ գործը պէտք է քննուի ենթադրեալ յանցանքի կատարման վայրում», նշեց Ռուշանեան:

Բայց եւ այնպէս մեղադրանքին մէջ նշուած չէ, թէ յատկապէս ո՛ւր կաթողիկոսը որոշած է կարգալոյծ ընել Գէորգ եպս. Սարոյեանը:

«Մենք համաձայն չենք դատարանի որոշման հետ, որովհետեւ մենք կարծում ենք, որ Ամենայն հայոց կաթողիկոսի տնօրինութիւնը քանի որ Էջմիածին քաղաքում է ընդունուել, ապա գործը պէտք է քննուէր այս դատարանում: Դատաւորը այդ կարծիքը չունէր», լրագրողներուն հետ ունեցած զրոյցին ընթացքին յայտնեց կաթողիկոսին պաշտպանական խումբէն Արա Զոհրաբեանը` շարունակելով. «Մի կողմից` սա խօսում է նաեւ նրա մասին, որ դատաւորները, բոլոր դէպքերում, հասկանում են, որ սա խնդրայարոյց գործ է. մի կողմից` իրենց խիղճն է, ի վերջոյ, արդարութիւնը, ճշմարտութիւնը, միւս կողմից` քաղաքական ճնշումը, եւ այս առումով երեւի թէ այս ճանապարհն են փնտռել եւ գտել»:

Փաստաբանը խնդրայարոյց որակեց դատի Երեւան տեղափոխութիւնը. «Դուք յիշում էք` Միքայէլ արք. Աջապահեանի գործով, էդպէս էլի ստիպողաբար Երեւանում քննեցին, վերջում պարզուեց, որ ընդդատութեան կանոնի խախտում կար, եւ բեկանուեց: Այսինքն` այս ժամանակահատուածը իրենք ջուրը լցրեցին: Եւ հիմա Երեւան քաղաքում քննելը նոյն վտանգներով է բնականաբար յղի: Եւ մի կարեւոր մտահոգութիւն էլ` այս գործը կարող է մակագրուել այնպիսի դատաւորների, որոնց հանրութիւնը չի վստահում, օրինակ` Մասիս Մելքոնեանին, Կարէն Ֆարխոյեանին, Արմինէ Մելիքսէթեանին եւ այլոց, որոնց դէպքում, բնականաբար, մենք արդարադատութեան սպասելու առումով խնդիր ենք ունենալու»: Ան աւելցուց, որ համապատասխան գործընթացներէն ետք իրենք իրենց դիրքորոշումը պիտի ներկայացնեն:

«Բոլոր դէպքերում, տեսնում եմ, որ դատաւորները ինչ-որ առումով խնդիր են տեսնում իրենց էս գործը քննելու հարցում: Սա մի կողմից դրական է, միւս կողմից` բացասական, որ եթէ այդ գիտակցութիւնը կայ, ապա կարելի էր ուղղակի արդար դատական աքթ կայացնել, որովհետեւ […] մենք օրինակ էս փուլում նախատեսել ենք միջնորդութիւն, որ էս փուլում կարճուի գործը: Մեր յաջորդ քայլը դա է լինելու, որովհետեւ էս գործը նոյնիսկ ապացոյցների հետազօտման ճանապարհ չպէտք է անցնի, այս գործը հէնց այս փուլում պէտք է կարճուի»,  յայտարարեց փաստաբանը:

Զոհրաբեան լուսարձակի տակ առաւ նաեւ այն, որ Ազգային ժողովի ամպիոնէն հնչող յայտարարութիւնները, սպառնալիքները` դատական համակարգի, իրաւապահ մարմիններու, պաշտօնատարներու նկատմամբ, բնականաբար, կ՛ահաբեկեն դատաւորները: «Դատաւորը նստած է, տեսնում է` նախկին նախագահ են կալանաւորում, որեւէ պաշտօնեայ են կալանաւորում, ինչ ուզում անում են, բնականաբար` սա ուղիղ, իր համար սա հաղորդագրութիւն է եւ անհանգստացնող հաղորդագրութիւն է», շեշտեց փաստաբանը: