ԹԱՍՍ կը հաղորդէ, թէ Թուրքիոյ նախագահ Ռեճեփ Թայիփ Էրտողան յայտարարած է, որ Ռուսիան պէտք է դադրեցնէ Սուրիոյ նախագահ Պաշշար Ասատին իր աջակցութիւնը եւ այնտեղ գործէ Միացեալ Նահանգներուն հետ համատեղ:

Ան դրական գնահատած է Հոմսի մէջ սուրիական օդուժի ռազմակայանին դէմ ամերիկեան հրթիռային յարձակումը` իբրեւ Իտլիպի մէջ քիմիական զէնքով յարձակումին արժանի պատասխան:

«Մենք յոյս ունինք, որ Ռուսիան ալ ատոր պիտի մասնակցի, կամ գոնէ պիտի դադրեցնէ Ասատին սատարել», ըսած է Էրտողան:

Թուրքիոյ նախագահը ողջունած է Ռուսիոյ այն յայտարարութիւնը, թէ Մոսկուայի կողմէ Սուրիոյ նախագահին աջակցութիւնը «պարտադիր չէ»:

Էրտողան չի կասկածիր Դամասկոսի մէջ քիմիական զէնքի գոյութենէն, որովհետեւ Անգարան, իր պնդումով, ունի յատուկ տուեալներ, որոնք այդ մէկը կը հաստատեն: