Իսրայէլի պաշտպանութեան նախարարութեան ընդհանուր տնօրէն Ամիր Պարամ Յունաստանն ու Կիպրոսը նշեց իբրեւ Հնդկաստանէն ու Արաբական ծոցի շրջանէն մինչեւ Արեւելեան Միջերկրական երկարող առաջարկուած շրջանային անվտանգութեան կառոյցի մը մէջ կարեւոր գործընկերներ` ընդգծելով Իրանի հետ լարուածութեան ենթահողի վրայ անոնց հետզհետէ աճող ռազմավարական կարեւորութիւնը: Այս մասին կը հաղորդէ «Կրիս Հայ Տեֆինիշըն» դիմատետրեան էջը:

Խօսելով Հերցլիայի խորհրդաժողովի ընթացքին` Պարամ յայտնեց, որ վերջին հակամարտութիւնները աւելի ուժեղ շրջանային գործակցութեան կարիքը ցոյց տուած են: Ան ըսաւ, որ Իսրայէլի զինուորական ու ճարտարագիտական կարողութիւնները Ծոցի պետութիւններուն տնտեսական ուժին եւ Յունաստանի եւ Կիպրոսի ռազմավարական դիրքերուն հետ միասին կրնան շրջանի տարածքին ապահովական ու տնտեսական հզօր դաշինք մը ստեղծել:

Պարամի համաձայն, Իրանի հետ վերջին ճակատումը շրջանային դերակատարներէն շատեր համոզեց, թէ աւելի սերտ գործակցութիւնը հասարակաց ապահովական մարտահրաւէրներու դիմակայման համար կենսական է:

Ան շեշտեց, որ այս ձեւաւորուող գործընկերութեան նպատակը ոչ թէ Իսրայէլի Միացեալ Նահանգներու հետ ռազմավարական դաշինքը փոխարինելն է, այլ զայն ամբողջացնելը, միեւնոյն ժամանակ յառաջ մղելով շրջանային կայունութիւնն ու ռազմավարական ճկունութիւնը:

«Կրիս Հայ Տեֆինիշըն» կը գրէ. «Պարամ այս մասին կը խօսի, մինչ Իսրայէլը, Յունաստանն ու Կիպրոսը կը շարունակեն իրենց ռազմական գործակցութիւնը ամրապնդել եռակողմ համաձայնագիրներով, միացեալ ռազմափորձերով եւ ընդլայնուած ռազմավարական ծրագրաւորումով, որուն նպատակը Արեւելեան Միջերկրականի մէջ անվտանգութեան ամրապնդումն է»: