Արտաքին գործոց նախարար Մարքօ Ռուպիոյին հասցէագրուած նամակով մը, խումբ մը ծերակուտականները խոր մտահոգութիւն յայտնած են Ազրպէյճանի նախագահ Իլհամ Ալիեւի վարչակազմին օրով շարունակուող կամայական ձերբակալութիւններուն համար:

Անոնք կ՛ընդգծեն, որ Ամերիկայի եւ Ազրպէյճանի միջեւ յարաբերութիւններու յաջողութիւնը կախեալ է անկէ, թէ արդեօք Պաքու պիտի կատարէ՞ իր պարտաւորութիւնները, որոնց շարքին` բոլոր քաղաքական բանտարկեալներու ազատ արձակումը:

Ծերակուտականները կը շեշտեն, որ Ամերիկայի եւ Ազրպէյճանի միջեւ գործակցութիւնը պէտք է հիմնուած ըլլայ ժողովրդավարական հաստատութիւններու ամրապնդման, օրէնքի գերակայութեան եւ հիմնարար իրաւունքներու պաշտպանութեան յանձնառութեան վրայ:

«Ազրպէյճանի մէջ կը պահուին առնուազն 300 քաղաքական բանտարկեալներ, իսկ անկախ լրագրողներու, ընդդիմութեան առաջնորդներու եւ քաղաքացիական հասարակութեան ներկայացուցիչներու նկատմամբ ճնշումները կը շարունակուին երկրի տարածքին: Մենք կը բաժնենք շրջանին մէջ խաղաղութիւն հաստատելու վարչակազմին հետաքրքրուածութիւնը եւ կոչ կ՛ուղղենք` Ազրպէյճանի մէջ պահուող բոլոր քաղաքական բանտարկեալներու ազատ արձակումը դարձնելու ռազմավարական գործընկերութեան պայման: Մեզ քաջալերած են Պիելոռուսիոյ մէջ քաղաքական բանտարկեալներու ազատ արձակումը ապահովելու գործին մէջ վարչակազմին յաջողութիւնները, եւ կոչ կ՛ուղղենք վարչակազմին` նմանօրինակ մօտեցում կիրարկելու նաեւ Ազրպէյճանի նկատմամբ», գրած են ծերակուտականները: