Գերապայծառ Աշգարեան Վախճանեցաւ - Հայերէն
13 Aralık 2019 - Հակական տոմար - Տարի : 4512 / Ամիս : Քաղոց / Օր : Պարխար / Ժամ : Հուրփեայլեալ

Հայերէն :

31 Temmuz 2012  

Գերապայծառ Աշգարեան Վախճանեցաւ

Գերապայծառ Աշգարեան Վախճանեցաւ Գերապայծառ Աշգարեան Վախճանեցաւ

Երէկ Մխիթարեան միաբանութենէն ստացանք գուժ մը, որով կը հաղորդուէր, որ միաբանութեան անդամ, հայ կաթողիկէ համայնքի Պէյրութի պատրիարքական թեմի նախկին ընդհանուր փոխանորդ հայր Վարդան եպս. Աշգարեան շաբաթ, 28 յուլիսին վախճանած է:

Գերապայծառ Աշգարեան ծնած էր 26 նոյեմբեր 1937-ին, Անտիոքի Հարպիէի արուարձանին մէջ` մուսալեռցի ծնողներէ: Նախնական ուսումը կը ստանայ Դամասկոսի Մեզզէի Ֆրանսական վարժարանին եւ Այնճարի հայ քոյրերու դպրոցին մէջ, իսկ յաջորդաբար` 25 յունիս 1950-ին անցնելով Վիեննայի Մխիթարեան ընծայարանը` կը բոլորէ իր երկրորդական ուսումը: 13 մարտ 1954-ին կրօնաւորական ուխտերով կ՛անդամակցի Մխիթարեան միաբանութեան:

Իմաստասիրական եւ աստուածաբանական բարձրագոյն ուսում կը ստանայ Վիեննայի Մխիթարեան ընծայարանի եւ պետական համալսարանին մէջ, ուր կը հետեւի նաեւ արեւելեան լեզուներու:

22 յունուար 1961-ին կուսակրօն քահանայ կը ձեռնադրուի Հապոզեան աբբահօր ձեռամբ: Հազիւ ձեռնադրուած կը ղրկուի Գահիրէի Հելիոպոլսոյ Մխիթարեան վարժարանը` վարելով փոխտնօրէնի պաշտօնը մինչեւ 1964: 1964-1987 կը փոխադրուի Լիբանան, ուր կը ստանձնէ Հազմիէի Մխիթարեան վարժարանի տնօրէնութիւնը` միաժամանակ բարձրագոյն դասարաններուն դասաւանդելով գրականութիւն եւ բարոյագիտութիւն: Նոյն շրջանին` 1965-1975 իբրեւ դասախօս դասաւանդած է Պէյրութի Սեն Ժոզեֆ համալսարանի արեւելեան լեզուներու բաժանմունքին մէջ: Գերապայծառ Աշգարեան գրեթէ իր ամբողջ կեանքի ընթացքին ծառայեց Պէյրութի հայ գաղութին մէջ հոգեւոր, կրթական, մշակութային, մամլոյ եւ հրատարակչական ասպարէզներուն մէջ: Բայց իր սրտին հոգեհարազատ էր մասնաւորապէս հայ մանուկին կրթադաստիարակութիւնը:

17 յունուար 1988-ին կը նշանակուի Հայ կաթողիկէ համայնքի Պէյրութի պատրիարքական թեմի ընդհանուր փոխանորդ` գործակցելով երջանկայիշատակ Յովհաննէս Պետրոս ԺԸ. Գասպարեան կաթողիկոս-պատրիարքին հետ, եւ ահա 1999-2011` կը շարունակէ աջակցիլ Ներսէս Պետրոս ԺԹ. կաթողիկոս-պատրիարքին:

2011-ին հանգստեան կոչուելէ ետք, 2012 յունուարին կը մեկնի Վիեննա` Մխիթարեան միաբանութեան ուխտին մէջ շարունակելու իր ներանձնական կեանքը:



Bu haber ..... kaynağından gelmektedir.
www.bolsohays.com un görüşünü yansıtmaz.

Anket Tüm Anketler

+