Թուրքիոյ նախագահ Ռեճեփ Թայիփ Էրտողան յայտարարեց. «Ուաշինկթըն պէտք է իբրեւ գործընկեր Թուրքիոյ եւ քրտական Ժողովրդավարական միութիւն կուսակցութեան միջեւ ընտրանք կատարէ»:

Էրտողան ամերիկեան վարչակազմին հարց տուաւ. «Ինչպէ՞ս կրնանք ձեզի վստահիլ: Ձեր գործընկերը ե՞ս եմ, թէ՞ Քոպանիի ահաբեկիչները»:

Յիշեցնենք, որ մէկ շաբաթ առաջ Միացեալ Նահանգներու նախագահի յատուկ պատուիրակ Պրեթ ՄքԿըրք այցելած էր Արաբ Բունար, ուր հանդիպում ունեցած էր քիւրտ ղեկավարներու հետ:

Էրտողան յայտնեց, որ Թուրքիա պատրաստ է իր սահմանը բանալու սուրիացի տեղահանուածներուն առջեւ, «եթէ ատիկա անհրաժեշտ է»: Ան նշեց, որ Հալէպ քաղաքի մատակարարման գլխաւոր ճամբուն փակման պատճառով «սպառնալիք մը կը դիմագրաւէ»:

Միւս կողմէ, Թուրքիոյ արտաքին գործոց նախարար Մեւլութ Չաւուշօղլու հեռաձայնային հաղորդակցութիւն մը ունեցաւ իր ամերիկացի պաշտօնակից Ճոն Քերրիի հետ եւ անոր հետ քննարկեց շրջանին եւ Սուրիոյ մէջ տիրող կացութիւնը:

�