Մարտ 18-19-ին, Քալիֆորնիոյ նահանգային համալսարանի Ֆրեզնոյի մասնաճիւղի Գործարարական բաժանմունքի «Փիթըրզ» սրահին մէջ (թիւ 191) տեղի պիտի ունենայ Հայոց Ցեղասպանութեան Նուիրուած միջազգային գիտաժողով մը՝ կազմակերպութեամբ համալսարանի Հայագիտական ծրագիրի վարիչ փրոֆ. Պարլօ Տէր Մկրտիչեանի եւ համալսարանի Հայագիտական ծրագիրի այցելու դասախօս Ումիթ Քիւրթի։ Այս մասին կը հաղորդէ ԱՄՆ-ի «Ասպարէզ» օրաթերթը։

«Կայսրութիւն, քաղաքականութիւն եւ պատերազմ. Հայոց Ցեղասպանութիւնը Օսմանեան կայսրութեան պարունակին մէջ» խորագրուած գիտաժողովի համահովանաւորներն են Հայագիտական ուսմանց ընկերակցութիւնը, հիւրընկալ համալսարանի Արուեստներու բաժանմունքը, իսկ անոր նեցուկ կը կանգնին՝ Թամըս Գույումճեան ընտանիքի հիմնարկը, Լիան Փիթըրզի անուան հիմնարկը եւ Հայագիտութեան Էմ. Վիքթորիա Գազան հիմնադրամը։

Գիտաժողովը պիտի սկսի Ուրբաթ, Մարտ 18-ին, երեկոյեան ժամը 7:30-ին, համալսարանի Արուեստներու բաժանմունքի վարիչ Սաուլ Հիմենեզի եւ Հայագիտական ծրագիրի վարիչ փրոֆ. Պարլօ Տէր Մկրտիչեանի բարի գալուստի խօսքերով, որմէ ետք Քալիֆորնիոյ համալսարանի Պըրքլիի մասնաճիւղի Հայագիտական ծրագիրի վարիչ դոկտ. Ստեփան Աստուրեան պիտի բանախօսէ Հայոց Ցեղասպանութեան ուսմանց զարգացման ու ապագային մասին։

Այնուհետեւ, Հայոց Ցեղասպանութեան տարբեր երեսներուն մասին քննարկումի մը պիտի մասնակցին Վարագ Քեթսեմանեան (Շիքակոյի համալսարան), Աննա Ալեքսանեան («Քլարք» համալսարան) եւ դոկտ. Եքթան Թիւրքեըլմազ («Զենթրում Մոտերներ Օրիէնթ» հիմնարկ, Պերլին)։

Գիտաժողովը պիտի շարունակուի Շաբաթ, Մարտ 19-ի առաւօտեան ժամը 10։30-ին, Ֆրեզնոյի համալսարանի Հայագիտական ծրագիրի «Պէրպէրեան» հիմնադրամի դասախօս դոկտ. Սերճիօ Լա Փորթայի գլխաւորութեամբ, համալսարանի շրջանաւարտից «Սմիթքեմփ» կեդրոնին մէջ, եւ բաժնուած պիտի ըլլայ երկու մասի։ Նախ ուսումնասիրութիւններ պիտի ներկայացնեն Եաշար Թոլկա Քորան (Շիքակոյի համալսարան) եւ դոկտ. Խաչիկ Մուրատեան («Քլարք» համալսարան), իսկ սուրճի դադարէն ետք՝ Ումիթ Քիւրթ («Քլարք» համալսարան) եւ փրոֆ. Պարլօ Տէր Մկրտիչեան։

Մուտքը ազատ է եւ ինքնաշարժները կարելի է պահել P5, P6 կանգառներուն մէջ (Ուրբաթ օրուան ներկայացումներուն համար) եւ P1, P2 կանգառներուն մէջ (Շաբաթ օրուան ներկայացումներուն համար):

Յաւելեալ տեղեկութեանց համար, դիմել (559) 278-2669 թիւին կամ այցելելwww.fresnostate.edu/armenianstudies կայքէջը:

�