Հայաստանի արտաքին գործոց նախարար Էդուարդ Նալբանդեան 30 մարտին Ժընեւի մէջ մասնակցած է Սուրիայէն գաղթականներու հարցերուն նուիրուած բարձր մակարդակի հանդիպումին:

Հայաստանի արտաքին գործոց նախարարութիւնը կը փոխանցէ, որ հանդիպումին ներկայ էին շուրջ հինգ տասնեակ երկիրներու նախարարներ, բարձրաստիճան պատուիրակութիւններ եւ բազմաթիւ միջազգային կազմակերպութիւններու ղեկավարներ:

«Տարիներ շարունակ Սուրիոյ մէջ շարունակուող քայքայիչ պատերազմին իբրեւ հետեւանք հարիւր հազարաւոր սուրիացիներ ապաստան կը փնտռեն ամբողջ շրջանին մէջ եւ անոր սահմաններէն դուրս: Հայաստանը առաջին երկիրներէն մէկն էր, որ խստօրէն դատապարտեց ՏԱՀԵՇ-ի, Նուսրայի եւ այլ ահաբեկչական խմբաւորումներու կողմէ Սուրիոյ փոքրամասնութիւններուն, անոնց շարքին` հայերուն եւ անոնց մշակութային ու կրօնական ժառանգութեան դէմ բարբարոսութիւնները: Վերոյիշեալ փոքրամասնութիւնները դարեր շարունակ այդ շրջանի բազմամշակութային, բազմազգ խճանկարին մաս կազմած են: Նախորդ տարի այստեղ` Մարդու իրաւունքներու խորհուրդին մէջ, Հայաստանը այդ գործողութիւնները բնորոշեց իբրեւ «քաղաքակրթութեան դէմ յանցագործութիւններ», իր խօսքին մէջ ըսած է նախարար Նալբանդեան:

Խօսելով Սուրիայէն Հայաստան ապաստանած սուրիահայերուն մասին` Հայաստանի արտաքին գործոց նախարարը նշած է. «Այսօր Սուրիայէն շուրջ 20 հազար գաղթականներ ապաստանած են Հայաստան` մեր երկիրը դարձնելով բնակչութեան թիւի յարաբերակցութեամբ սուրիացի գաղթականներ ընդունած երրորդ պետութիւնը Եւրոպայի մէջ: Ասիկա զգալի թիւ է ընդամէնը 3 միլիոն բնակչութիւն ունեցող երկիրի մը համար, որ մօտիկ անցեալին արդէն հարիւր հազարաւոր գաղթականներ ընդունած է Ազրպէյճանէն: Մենք լաւ գիտենք, թէ ինչ կը նշանակէ գաղթական ըլլալ եւ ապաստան տալ մեծ թիւով տեղահանուածներու, եւ, անշուշտ, այս քննարկումին կը մասնակցինք համերաշխութեան եւ պատասխանատուութեան բարձր զգացումով», շարունակած է նախարարը:

Այնուհետեւ Նալբանդեան հաստատած է, որ Հայաստան պիտի շարունակէ իր առաւելագոյնը ընել` հոգ տանելու Հայաստանի մէջ ապաստան գտած սուրիացիներուն. «Մենք կ՛ողջունենք Հայաստանին օժանդակութեան տրամադրումը` Սուրիայէն հասած գաղթականներուն առաջնահերթ մարդասիրական կարիքները հոգալու եւ մեր երկրին մէջ անոնց համարկման աջակցելու նպատակով: Ատիկա կատարելու համար Հայաստանի կառավարութիւնը իրականացուցած է համապատասխան օրէնսդրական փոփոխութիւններ»:

�

�