Արմէնփրես վկայակոչելով ռուսական լրատուամիջոցները, կը հաղորդէ, որ Ռուսիոյ սպայակոյտի անդամ Սերկէյ Ռուտսքոյ յայտարարած է, որ Թուրքիան կը շարունակէ զէնք մատակարարել շրջանին մէջ աշխուժ գործունէութիւն ծաւալած Ժապհաթ Նուսրա ահաբեկչական խմբաւորումին:

«Թուրքիան Միացեալ Նահանգներու վերահսկողութեան տակ գտնուող տարածքներուն վրայով զէնք կը մատակարարէ Ժապհաթ Նուսրային», ըսած է Ռուտսքոյ:

Ան ըսած է, որ հակառակ յայտարարուած զինադուլին, Թուրքիան վերջ չէ դրած Ժապհաթ Նուսրային զէնքի մատակարարումին եւ անոր զինեալներու հովանաւորումին:

Նշելով, որ ՏԱՀԵՇ-ի հետ համագործակցող ժիհատական կազմակերպութիւնները կը շարունակեն Հալէպի մօտ գտնուող Շէյխ Մաքսուտ եւ Զակրա քաղաքներուն դէմ իրենց յարձակումները, Ռուտսքոյ ըսած է, որ եթէ այդ յարձակումները յաջողութիւն ունենան, ապա Սուրիոյ հիւսիսը պիտի յայտնուի դժուար կացութեան մէջ:

«Սփութնիք» կը հաղորդէ, որ ատոր կողքին Ռուսիան յայտարարած է, որ Հալէպի ամբողջական ազատագրման առնչուած ծրագիր տակաւին գոյութիւն չունի:

�