Թուրքիոյ վարչապետ Պինալի Եըլտըրըմ եւ Իսրայէլի վարչապետ Պենիամին Նեթանիահու անջատ մամլոյ ասուլիսներու ընթացքին յայտարարեցին, որ գոյացած է երկու երկիրներուն միջեւ յարաբերութիւններու բնականոնացման համաձայնութիւն մը:

Եըլտըրըմ յայտնեց, որ համաձայնագիրը պիտի ստորագրուի այսօր, ապա պիտի փոխանցուի Իսրայէլի նախարարաց խորհուրդին եւ Թուրքիոյ խորհրդարանին` առ ի վաւերացում: Ան ըսաւ, որ Իսրայէլ համաձայնած է 20 միլիոն տոլար վճարել «Մաւի Մարմարա» նաւու զոհերուն ընտանիքներուն:

Թուրքիոյ արտաքին գործոց նախարարութենէն աղբիւր մը «Թըրքիշ Տէյլի Նիուզ»-ին յայտնեց, որ համաձայնութիւնը անջատաբար եւ միատեղ պիտի ստորագրուի Անգարայի մէջ Թուրքիոյ արտաքին գործոց փոխնախարար Ֆերիտուն Սինիրլիօղլուի կողմէ եւ Թել Աւիւի մէջ Իսրայէլի արտաքին գործոց փոխնախարար Տորի Կոլտի կողմէ:

Թէեւ Եըլտըրըմ յայտարարեց, որ Կազայի շրջափակումը մեծաւ մասամբ պիտի վերցուի, սակայն Նեթանիահու շեշտեց, որ Իսրայէլի կողմէ ծովային պաշարումը ի զօրու պիտի մնայ, հակառակ անոր որ Թուրքիա Կազային օժանդակութիւն մատակարարելու զիջումներ ապահոված է:

�