Թուրքիոյ նախագահի բանբեր Իպրահիմ Քալըն թրքական «Թէ.Ռէ.Թէ.» պատկերասփիւռի կայանին հետ ունեցած հարցազրոյցի մը ընթացքին բացառեց Թուրքիոյ մասնակցութիւնը Սուրիոյ Ռաքքա քաղաքին մէջ ՏԱՀԵՇ-ի դէմ Միջազգային դաշինքի ուժերուն շղթայազերծելիք որեւէ գործողութեան, որուն կը մասնակցին նաեւ քիւրտերը` աւելցնելով. «Բանակցութիւնները ընթացքի մէջ են, եւ տակաւին յստակ ոչինչ կայ»:

«Մեր կեցուածքը, որ կը նկատենք անփոփոխ, Մընպեժի եւ Ժարապլոսի մէջ մեր ունեցած նոյն կեցուածքն է: Բացառուած է, որ մասնակցինք գործողութեան մը, որուն մաս կը կազմեն քրտական Ժողովրդավարական միութիւն կուսակցութիւնը կամ քրտական Ժողովուրդի պաշտպանութեան ջոկատները», ըսաւ Քալըն:

«Սկզբունքով մենք կը զօրակցինք Ռաքքան եւ սուրիական միւս քաղաքները ՏԱՀԵՇ-էն ձերբազատելուն, սակայն ինչպէս նախապէս ըսինք, այդ առնչութեամբ սկզբունքներ եւ պայմաններ ունինք», նշեց Թուրքիոյ նախագահի բանբերը:�