Միացեալ Նահանգներու արտաքին գործոց նախարարութեան բանբեր Մարք Թոնըր Անգարային եւ Պաղտատին կոչ ուղղեց` «մեղմացնելու իրենց միջեւ գոյութիւն ունեցող լարուածութիւնը, մասնաւորաբար Թուրքիոյ նախագահ Ռեճեփ Թայիփ Էրտողանի եւ Իրաքի վարչապետ Հայտար Ապատիի միջեւ տեղի ունեցած բուռն բանավէճէն ետք, մինչ պատրաստութիւնները կը շարունակուին Մուսուլը ՏԱՀԵՇ ահաբեկչական խմբաւորումէն ազատագրելու»:

«Իրաք գտնուող բոլոր միջազգային ուժերը պէտք է իրաքեան կառավարութեան հետ համաձայնութիւն ունենան եւ համակարգում կատարեն` հովանաւորութեամբ Միջազգային դաշինքին, զոր Միացեալ Նահանգներ կը ղեկավարեն ընդդէմ ՏԱՀԵՇ-ի», ըսաւ ան` կոչ ուղղելով կեդրոնանալու հասարակաց թշնամիին` ՏԱՀԵՇ-ի վրայ:

Թոնըր նաեւ կոչ ուղղեց «կանխարգիլելու որեւէ մագլցում, իսկ որեւէ քայլ պէտք է կատարուի յարգելով Իրաքի գերիշխանութիւնը եւ անոր կառավարութեան հաւանութեամբ»:

Իրաքի շիի ղեկավար դէմքերէն, իրաքեան ազգային դաշինքի ղեկավար Ամմար Հաքիմ խօսքը ուղղելով Էրտողանին ըսաւ. «Պէտք է սահմանդ գիտնաս, եւ կը խրատենք, որ դադրիս իրաքցիներուն համբերութիւնը փորձելէ»:

�