Թուրքիոյ արտաքին գործոց նախարարութիւնը ծանր քննադատութեան ենթարկած է Կիպրոսի խորհրդարանին կողմէ երկրի դպրոցական ծրագիրին մէջ «Էնոզիս»-ի տօնակատարութիւններու ներառման որոշումը:

Նշենք, որ նախապէս Կիպրոսի խորհրդարանը որդեգրած է Կիպրոսի միաւորման մասին 1950-ի հանրաքուէի (պատմութեան մէջ յայտնի իբրեւ Էնոզիսի հանրաքուէ) տարեդարձը տօնելու վերաբերեալ որոշում:

Կիպրոսի նախագահ Նիքոս Անասթասիատիս իր կարգին յայտարարած է, որ այս որոշումը չի կրնար խանգարել կիպրական խնդիրին լուծումը:

Թրքական «Անատոլու» լրատու գործակալութիւնը կը հաղորդէ, որ Թուրքիոյ արտաքին գործոց նախարարութիւնը` քննադատելով Կիպրոսի խորհրդարանի որոշումը, նշած է, որ կիպրացի թուրքերու գոյութիւնը հաշուի չառնող այս մօտեցումը կարիքը ունի հիմնովին փոխուելու, հակառակ պարագային կիպրական հիմնախնդիրին լուծումը շատ աւելի պիտի բարդանայ:

Յիշեցնենք, որ յունուարին Ժընեւի մէջ տեղի ունեցած էին Կիպրոսի հիմնախնդիրին շուրջ Կիպրոսի եւ թուրք կիպրացիներու ղեկավարներուն միջեւ բանակցութիւնները: ՄԱԿ-ի նոր ընդհանուր քարտուղար Անթոնիօ Կութիերես Ժընեւեան բանակցութիւնները նկատած էր յառաջընթացի համար «պատմական կարելիութիւն»: Կիպրոսի կղզին վերամիաւորելու նախապէս կատարուած փորձերը տապալած են:

Բանակցութիւններու երկրորդ փուլին հոլովոյթին միացած էին Կիպրոսի անվտանգութեան երաշխաւոր երկիրներու` Բրիտանիոյ, Յունաստանի եւ Թուրքիոյ ղեկավարները:

Կղզին 1974-ին թրքական բանակի Կիպրոսի ներխուժումէն ի վեր կը մնայ մասնատուած:

�