Մարոնի համայնքի Պշարա Ռայի պատրիարքը երէկ Վատիկանի մէջ հանդիպում մը ունեցաւ Ֆրանչիսկոս պապին հետ:

Հանդիպումին ընթացքին Ռայի պատրիարք Պապին յանձնեց Լիբանան այցելութեան պաշտօնական հրաւէր մը, ինչպէս նաեւ Լիբանանի եւ Միջին Արեւելքի մէջ տիրող կացութեան ամբողջական տեղեկագիր մը:

Ան շնորհակալութիւն յայտնեց պապին` Եգիպտոս կատարած այցելութեան առիթով:

Հանդիպումին ընթացքին պապը շեշտեց, որ ինք մօտիկ կը զգայ արաբ ժողովուրդին, որ կը դիմագրաւէ բազմաթիւ հարցեր, տագնապներ եւ բռնարարքներ` արտայայտելով իր զօրակցութիւնը բոլոր տանջուածներուն, անիրաւուածներուն եւ գաղթականներուն:

Ան յոյս յայտնեց, որ խաղաղութիւն տիրէ Միջին Արեւելքի եւ ամբողջ աշխարհին մէջ:

Նշենք, որ հանրապետութեան նախագահ զօր. Միշել Աուն իր կարգին լիբանանեան պետութեան կողմէ Լիբանան այցելութեան հրաւէր մը յանձնած էր պապին: