Գերմանիոյ արտաքին գործոց նախարար Զիկմար Կապրիէլ յայտարարեց, որ իր երկիրը մտադիր չէ փոխել Թուրքիոյ նկատմամբ կարծր քաղաքականութիւնը` նշելով, որ Գերմանիան ստիպուած է այդ քաղաքականութիւնը երկար ատեն վարել եւ չի նախատեսեր, որ կացութիւնը փոխուի քանի մը շաբաթէն:

Կապրիէլ ընդգծեց, որ ներկայ փուլին կարելի չէ Մաքսային միութեան ստեղծման շուրջ Եւրոպական Միութեան եւ Թուրքիոյ միջեւ բանակցութիւնները շարունակել: «Թուրքիոյ կողմէ ձերբակալուած գերմանացի քաղաքացիներուն նկատմամբ վարմունքին լոյսին տակ Մաքսային միութեան բանակցութիւններու շարունակումը չեմ կրնար պատկերացնել», ըսաւ ան:

Մեկնաբանելով Թուրքիոյ նախագահ Ռեճեփ Թայիփ Էրտողանի գերմանաբնակ թուրքերուն ուղղած այն կոչը, որով անոնցմէ պահանջած էր Գերմանիոյ մէջ նախատեսուած խորհրդարանական ընտրութիւններուն ձայն չտալ Թուրքիոյ «թշնամի» կուսակցութիւններուն` Քրիստոնեայ-ժողովրդավարական միութեան, Ընկերվար- ժողովրդավարական կուսակցութեան եւ Կանաչներու կուսակցութեան, Կապրիէլ յայտնեց, որ Էրտողանի կոչը մինչեւ օրս որեւէ երկրի ղեկավարի կողմէ չլսուած ու չտեսնուած անարգանք է Գերմանիոյ գերիշխանութեան:

Զիկմար Կապրիէլ գերմանացիներուն կոչ ուղղեց պայքարելու իրենց երկրի գերիշխանութեան ուղղուած այդ յարձակումին դէմ: