​Նոր Զարթօնքի Մամլոյ Հաղորդագրութիւնը` Վճռաբեկ Ատեանի Հայ Զինուոր Սեւակ Պալըքճըի Սպանութեան Մասին Կա - Հայերէն
29 Mart 2024 - Հակական տոմար - Տարի : 4516 / Ամիս : Արեգ / Օր : Վարագ / Ժամ : Լուսակն

Հայերէն :

25 Temmuz 2021  

​Նոր Զարթօնքի Մամլոյ Հաղորդագրութիւնը` Վճռաբեկ Ատեանի Հայ Զինուոր Սեւակ Պալըքճըի Սպանութեան Մասին Կա -

​Նոր Զարթօնքի Մամլոյ Հաղորդագրութիւնը` Վճռաբեկ Ատեանի Հայ Զինուոր Սեւակ Պալըքճըի Սպանութեան Մասին Կա ​Նոր Զարթօնքի Մամլոյ Հաղորդագրութիւնը` Վճռաբեկ Ատեանի Հայ Զինուոր Սեւակ Պալըքճըի Սպանութեան Մասին Կայացուցած Որոշումին Առնչութեամբ

24 ապրիլի 2011-ին Սեւակ Պալըքճը սպաննուեցաւ Քըվանչ Աղաօղլուի կողմէ Հայոց ցեղասպանութեան 96-րդ տարելիցին, երբ իր պարտադիր զինուորական ծառայութիւնը կը կատարէր Պաթմանի Քոզլուք շրջանին մէջ: Հրանդ Տինքի սպանութենէն չորս տարի ետք մէկը մեզ` հայերուս կը յիշեցնէր իրենց հարիւրամեայ ցեղասպանութեան յիշողութիւնը: 10-ամեայ դատավարութեան աւարտին ոճրագործ Քըվանչ Աղաօղլու Վճռաբեկ ատեանին որոշումով 16 տարի 8 ամիս բանտարկութեամբ պատժուեցաւ, որ ձայներու մեծամասնութեամբ վերջնականօրէն յայտարարուեցաւ 13 յուլիս 2021-ին: Հակառակ անոր որ Սեւակ Պալըքճը սպաննուած էր դիտաւորեալ կերպով, Վճռաբեկ ատեանը հաստատեց ոճրագործի պատիժի մեղմացումը` պատճառաբանելով, որ ոճրագործը գործած է հաւանական դիտաւորութեամբ:

Սեւակ Պալըքճըի սպանութենէն ետք պարզուեցաւ, որ հրամանատարները երկու հակասական տեղեկագիր պատրաստած են` մէկուկէս ժամ տարբերութեամբ: Առաջին տեղեկագիրին մէջ գրուած էր, որ ոճրագործ Աղաօղլու զէնքը ուղղած է դէպի Սեւակ, իսկ երկրորդին մէջ, որ պատրաստուած էր ոճրագործի պաշտպանութեան համապատասխան, Սեւակ մահացած է «անզգուշօրէն»: Սպանութենէն ետք հրամանատարները փորձեցին փակել դէպքը` առանց յանցագործութեան դէպքի վայրի հետաքննութեան: Վկաներէն Հալիլ Էքշի իր առաջին յայտարարութեան մէջ ըսաւ, որ ոճրագործ Քըվանչ Աղաօղլու դիտաւորեալ սպաննած է Սեւակ Պալըքճըն, բայց յետոյ փոխեց իր յայտարարութիւնը եւ ըսաւ, որ դէպքը տեղի ունեցած է անզգուշութեամբ, եւ ոճրագործն ու Սեւակը կը կատակէին: Վկայ Հալիլ Էքշի դատուեցաւ եւ պատժուեցաւ կեղծ ցուցմունքներու համար: Վկայ Հալիլ Էքշի եւ ընտանիքը պնդեցին, որ ճնշում գործադրուած է իր ընտանիքի եւ իր վրայ, որպէսզի ցուցմունք տան ոճրագործի օգտին:

Տիարպեքիրի օդուժի հրամանատարութեան 2-րդ զինուորական դատարանը որոշում կայացուց, որ Սեւակ Պալըքճը անզգուշօրէն սպաննուած է, եւ ոճրագործը դատապարտեց 4 տարի 5 ամիս ազատազրկման: Նոյն օրը Սեւակ Պալըքճըի մայրը` Անի Պալըքճը, իր նամակին մէջ գրած էր հետեւեալը. «Երանի վերջ գտնէր այն մտայնութիւնը, որ կը մտածէ, թէ հայ մը սպաննելով կարելի է հերոս դառնալ»:

Պալըքճը ընտանիքը վճռական պայքար կը մղէր եւ երբեք չէր դադրեցներ արդարութեան պահանջը: Սեւակի հայրը` Կարապետ Պալըքճը, ըսած էր հետեւեալը. «Երբ մենք կ՛երթայինք որոշ տեղեր, ոմանք կ՛ըսէին. «Մենք քեզի կը զօրակցինք», բայց երբ օգնութիւն կը պահանջէի, կը տեսնէի, որ այնտեղ ոչ ոք կայ: Ես մինակ եմ: Ես կ՛ուզեմ, որ մեր թիկունքին գտնուող մարդիկ քիչ մը մեզի հետ ըլլան, սեղմեն մեր տան դրան զանգակը: Մնացինք մինակ: Միւս կողմէ, այո՛, մենք որոշ տեղեր մինակ չէինք, մեր ընկերներէն մի քանին եկած էին Տիարպեքիր եւ կ՛աջակցէին մեզ: Ես ամէնէն շատ շնորհակալ եմ Նոր զարթօնքին: Շնորհակալ եմ Կարօ Փայլանին, Ժաքլին Չելիքին, ես կը ցանկանայի շնորհակալութիւն յայտնել բոլորին, որոնց անունները հիմա չեմ յիշեր»:

24 ապրիլի 2019-ին Սեւակ Պալըքճըի գերեզմանին մօտ տեղի ունեցած ոգեկոչման ընթացքին Նոր զարթօնքի անունով ելոյթ ունեցաւ Ալեքսիս Քալք. «Սեւակի ոճրագործները դեռ չեն ստացած անհրաժեշտ պատիժները: Ցաւօք, արդարութեան համար պայքարը դեռ կը շարունակուի Սեւակի եւ բոլոր ճնշուածներուն համար: Դեռ խաղաղութեան, եղբայրութեան լեզու չէ հաստատուած մեր երկրին մէջ: Ցաւօք, ոճրագործներու լեզուն գերակշռող է մեր երկրին մէջ: Այս իրավիճակը խորապէս կը տխրեցնէ մեզ: Այս լեզուն կ՛արգիլէ, որ արդարութիւն հաստատուի: Մենք պիտի շարունակենք մեր պայքարը յանուն արդարութեան, հաւասարութեան եւ եղբայրութեան բոլոր ճնշուած մարդոց, Սեւակ Պալըքճըի, Հայոց ցեղասպանութեան զոհերուն համար: Շնորհակալութիւն կը յայտնենք բոլոր անոնց, որոնք կը պայքարին նորածինէն ոճրագործ ստեղծող խաւարին դէմ»: Ալեքսիս Քալք այս ելոյթին պատճառով բերման ենթարկուեցաւ: Հարցաքննութենէն ետք ազատ արձակուեցաւ:

Ինչպէս այսօր, տասը տարի առաջ ալ, պետութիւնը վառ կը պահէր ատելութիւնն ու թշնամութիւնը տարբեր ազգային ինքնութիւններու նկատմամբ: Զինուորներու կասկածելի մահուան դէպքեր իրարու կը յաջորդէին: 2012-ին սպայակոյտի հրամանատարութեան կողմէ կատարուած յայտարարութեան համաձայն, վերջին տասը տարուան ընթացքին 934 մարդ անձնասպան եղած էր: Իրենց ազգային ինքնութեան, հաւատքի, քաղաքական հայեացքներու պատճառով խոշտանգուած եւ սպաննուած զինուորներու սպանութիւնները կը ծածկուէին թատրոնով, որուն կը մասնակցէին զինուորական դատարանները, իսկ սպանութիւնները կը մնային անպատիժ:

Այս երկրին մէջ, ուր դատարանի դահլիճները վերածուած էին թատրոններու, մենք կազմակերպուած պայքար մղեցինք, որպէսզի բացայայտուի ճշմարտութիւնը եւ այս ատելութեան յանցագործութիւնը չմնայ անպատիժ: Դատավարութիւններու ընթացքին Պոլսոյ եւ Տիարպեքիրի մէջ միաժամանակ բողոքի ցոյցեր եւ մամլոյ յայտարարութիւններ կազմակերպեցինք` պահանջելով արդարութիւն: Հրապարակ իջանք զօրակցելու համար Պալըքճը ընտանիքին հետ, որպէսզի Սեւակ Պալըքճը չմոռցուի, ուրիշ սեւակներ չսպաննուին: Մենք միշտ ջանք թափեցինք, որպէսզի նիւթը մնայ հասարակութեան օրակարգին վրայ, եւ փորձեցինք Թուրքիոյ Ազգային խորհրդարանը տեղեակ պահել այս գործէն:

Ոճրագործը պատժուեցաւ: Գոնէ մէկ ատելութեան յանցագործութիւն այս անգամ անպատիժ չմնաց: Պալըքճը ընտանիքի վճռական կեցուածքը, արդարութեան պահանջը եւ կազմակերպուած պայքարը դրական դեր խաղացին: Եւս մէկ անգամ մենք տեսանք, որ մեզ այլ բան չի մնար, քան կազմակերպուած պայքար մղել ատելութեան դէմ եւ իրարու զօրակցիլ:

Մենք յարգանքով եւ երախտագիտութեամբ կը յիշենք բոլոր անոնք, որոնք, Պալըքճը ընտանիքը մինակ չթողուցին. յատկապէս Տիարպեքիրի փաստաբաններու միութեան նախագահ Թահիր Էլչին, որ սպաննուեցաւ 28 նոյեմբեր 2015-ին, երբ խաղաղութիւն կը պահանջէր մամուլի յայտարարութեան մը ընթացքին:

Սեւակ Պալըքճըն պիտի չմոռցնենք:








Bu haber aztag kaynağından gelmektedir.

Haber metninde yer alan görüşler haber kaynağı (aztag) ve yazarına ait olup,
bolsohays.com sitesi haber hakkında herhangi bir görüş üstlenmemektedir.

Opinions expressed are those of the author(s)-(aztag). They do not purport to reflect the opinions or views of bolsohays.com

Diğer Haberler

+