Շիշլի մարզակումբին նախաձեռնութեամբ, Գնալը կղզիին մէջ տեղի ունեցաւ լուսահոգի Ղազարոս Ունանի յիշատակին ձօնուած վոլէյպոլի մրցաշարքը, որ այս տարի կազմակերպուեցաւ 2-րդ անգամ։ Հանգուցեալ Ղազարոս Ունան եղած էր ակումբի պատուոյ նախագահներէն։

48 մարզիկ 8 խումբի մարզաշապիկով մասնակցեցաւ այս մրցաշարքին, որ հաճելի մրցապայքարի մը թատերաբեմը հանդիսացաւ։ Աւարտական խաղերէ վերջ դափնեկիրներուն մրցանակները յանձնուեցան՝ ձեռամբ հանգուցեալ Ղազարոս Ունանի թոռան՝ Քայլա Քէշիշեանի։

Շիշլի մարզակումբի վարչութեան ատենապետ Ալէն Թեքպըչաք եւ իր գործակից ընկերներն ալ, նախկին վարչայիններով հանդերձ, ջերմօրէն շրջապատեցին երիտասարդները, որոնց խաղարկութիւնը վերածուեցաւ ոգեկոչման։