Աղբիւրներ «Սի.Էն.Էն.» արբանեակային պատկերասփիւռի կայանին յայտնեցին, որ Իսրայէլ Իրանի հետ պատերազմի ընթացքին գաղտնաբար Ազրպէյճանի մէջ զինուորական եւ հետախուզական մասնայատուկ ուժեր տեղակայած է` Իրանի դէմ գործողութիւնները դիւրացնելու համար Միջին Արեւելքի մէջ տարածուած գաղտնի դիրքերու ցանցի ծիրին մէջ:

Աղբիւրները պատկերասփիւռի կայանին յայտնեցին, որ այդ ուժերը գործած են Ազրպէյճանի հարաւը Իրանի հիւսիային սահմաններուն սահմանակից շարք մը դիրքերու մէջ, եւ 60 մղոն հեռաւորութեան վրայ իրանեան Թաւրիզ քաղաքէն, զոր Իսրայէլ պատերազմի ընթացքին հարուածեց:

«Սի.Էն.Էն.» լուսարձակները կեդրոնացուց այն դերերուն վրայ, զորս պաշտօնապէս եւ ոմանք առանց իմանալու կամ ամբողջական հաւանութեան խաղացին Թեհրանի դէմ գործողութիւնները դիւրացնելու եւ հակամարտութեան մէջ ներքաշուելու առումով:

Պատկերասփիւռի կայանին համաձայն, Ազրպէյճանի մէջ գաղտնի դիրքերուն կողքին Իսրայէլ շարք մը գաղտնի ռազմակայաններ ու դիրքեր ունէր շարք մը երկիրներու մէջ, որոնց շարքին Իրաքի, Արաբական Միացեալ Էմիրութիւններու եւ Սոմալիլանտի մէջ:

Աղբիւրներէն մէկը «Սի.Էն.Էն.»-ին յայտնեց, որ Ազրպէյճանի մէջ գործողութեան մասնակցած են քանի մը տասնեակ զինուորներ եւ Մոսատի անդամներ:

Միացեալ Նահանգներու մէջ Ազրպէյճանի դեսպանատան բանբերը «Սի.Էն.Էն.»-ին յայտնեց. «Կտրուկ կերպով կը մերժենք Ազրպէյճանի հողերու այլ երկիրներու դէմ գործողութիւններ կատարելու համար օգտագործման մասին անհիմն պնդումները»:

Ազրպէյճանի արտաքին գործոց նախարարութիւնը հերքեց «Սի.Էն.Էն.»-ի հաղորդած լուրը` նշելով, որ պատկերասփիւռի կայանէն կը սպասէ, որ հերքէ յօդուածը, որ, ըստ նախարարութեան պնդումին, Ազրպէյճանի մէջ իսրայէլեան ուժերու տեղակայման վերաբերեալ անարդարանալի պնդումներ կը բովանդակէր: