«Հայաստանի վարչապետ Նիկոլ Փաշինեան պիտի մասնակցի Միացեալ Նահանգներու եւ Իսրայէլի օդային հարուածներուն հետեւանքով զոհուած Իրանի գերագոյն հոգեւոր պետ այաթոլլա Ալի Խամենէիի յուղարկաւորութեան», կը հաղորդէ Թեհրանի մէջ գործող ԻՍՆԱ լրատու գործակալութիւնը:

Խամենէիի յուղարկաւորութեան` Փաշինեանի մասնակցութեան մասին գործակալութեան տեղեկացուցած է Իրանի խորհրդարանի հայազգի պատգամաւոր Արա Շահվերդեան:

Շահվերդեանի համաձայն, Հայաստանի վարչապետի այցելութեան մասին պայմանաւորուածութիւնը ձեռք բերուած է Իրանի փոխնախագահ Սեյիտ Համիտ Փուրմոհամատիի` անցեալ շաբաթավերջին Հայաստան կատարած այցելութեան ընթացքին:

«Փուրմոհամատիի եւ Փաշինեանի հանդիպման ժամանակ Հայաստանի ղեկավարը պատրաստակամութիւն յայտնած է մասնակցելու յեղափոխութեան սպաննուած ղեկավարի յուղարկաւորութեան», նշած է Շահվերդեան:

Հայաստանի կառավարութիւնը առայժմ վարչապետ Փաշինեանի մասնակցութեան վերաբերեալ տեղեկութիւն չէ տարածած: