Գամիշլիի մէջ քաղաքացիներու շարքին 5 զոհեր եւ 20 վիրաւորներ արձանագրուեցան, երբ քաղաքին կեդրոնին մէջ ճաշարանի մը դէմ անձնասպանական գործողութիւն մը տեղի ունեցաւ:

ՍԱՆԱ լրատու գործակալութիւնը հաղորդեց, որ անձնասպանական գործողութեան հեղինակը ՏԱՀԵՇ-ի անդամ մըն է, եւ կարելի եղած է վնասազերծել ՏԱՀԵՇ-ի երկու այլ անդամներ, որոնք կը պատրաստուէին նոյն վայրին մէջ իրենք զիրենք պայթեցնելու:

Միւս կողմէ, Փենթակոնը յայտարարեց, որ Միջին Արեւելքի մէջ ամերիկեան ուժերու հրամանատար Ճոզեֆ Վոթել կարճատեւ այցելութիւն մը տուած է հիւսիսային Սուրիա:

Քրտական կայքեր հաղորդեցին, որ երկու օր առաջ քրտական Ժողովրդավարական միութիւն կուսակցութեան նախագահ Սալեհ Մուսլիմ Արաբ Բունարի գիւղական շրջանին մէջ հանդիպում ունեցած է Ուաշինկթընի ղեկավարած միջազգային դաշինքի մէկ ներկայացուցիչին հետ եւ համաձայնութիւն գոյացուցած 12 հազար զինեալներու մասնակցութեամբ Ռաքքայի դէմ զինուորական գործողութեան մը շղթայազերծման շուրջ:

Մինչ այդ, քրտական Ժողովուրդի պաշտպանութեան ջոկատները վերատիրացան Ռաքքայէն շուրջ 45 քիլոմեթր հիւսիս-արեւելք գտնուող Հայշա գիւղին:

�