Թրքական «Էվրենսել» օրաթերթը կը հաղորդէ, որ Թուրքիոյ մէջ ձերբակալուած են քրտամէտ Ժողովուրդներու ժողովրդավարական կուսակցութեան 11 երեսփոխաններ, ներառեալ կուսակցութեան համանախագահներ Սելահեթթին Տեմիրթաշը եւ Ֆիկեն Եիւքսեքտաղը:

Տեմիրթաշ «Թուիթըր»-ի վրայ յայտնած է իր ձերբակալութեան մասին: «Բռնի ուժով ձերբակալման հրամանով` անվտանգութեան աշխատակիցները Տիարպեքիրի տանս դրան դիմաց են», գրած է ան:

Թուրքիոյ ներքին գործոց նախարարութիւնը հաստատած է ընդդիմադիր 11 երեսփոխաններու ձերբակալութեան մասին լուրը:

Ժողովուրդներու ժողովրդավարական կուսակցութեան ձերբակալուած անդամներն են` Սելահեթթին Տեմիրթաշ, Ֆիկեն Եիւքսեքտաղ, Իտրիս Պալուքեն, Սըրրը Սիւրէյիա Էօնտեր, Ֆերհաթ Էնճու, Կիւլսեր Եըլտըրըմ, Սելմա Ըրմաք, Զիա Փիր, Նուրսել Այտողան, Լէյլա Պիրլիք, Ապտուլլա Զէյտան:

Ձերբակալման ենթակայ անձերու ցուցակին վրայ են նաեւ երեսփոխաններ Ֆայսալ Սարըյըլտըզ եւ Թուղպա Հեզեր Էօզթիւրք, որոնք երկրէն դուրս գտնուելով տակաւին չեն ձերբակալուած:

Մայիսին Թուրքիոյ խորհրդարանի սահմանադրական յանձնախումբը որդեգրած էր Ժողովուրդներու ժողովրդավարական կուսակցութեան շարք մը երեսփոխաններ անձեռնմխելիութենէ զրկելու մասին որոշում մը:

Այժմ երեսփոխաններու անձեռնմխելիութեան մասին օրէնքը, որ ամրագրուած էր Թուրքիոյ սահմանադրութեան 83-րդ յօդուածով եւ որով կ՛արգիլուէր երեսփոխանները «ձերբակալել, հարցաքննել, դատապարտել առանց խորհրդարանի արտօնութեան», կը նկատուի անվաւեր:

Յիշեցնենք, որ դեկտեմբեր 2015-ին, Թուրքիոյ վարչապետ Ահմեթ Տաւութօղլու քննադատած էր Ժողովուրդներու ժողովրդավարական կուսակցութեան քաղաքականութիւնը եւ անոր անդամները մեղադրած Քրտական աշխատաւորական կուսակցութեան (ՔԱԿ) հետ կապեր ունենալու յանցանքով:

«Անֆթիւրքճէ» կայքը հաղորդեց, որ Եւրոպայի մէջ գործող քրտական կազմակերպութիւնները քրտամէտ կուսակցութեան երեսփոխաններու ձերբակալութեան դէմ բողոքի ցոյցեր կատարած են Գերմանիոյ, Ֆրանսայի, Անգլիոյ եւ Աւստրիոյ շուրջ 20 քաղաքներու մէջ: Միւս կողմէ, Թուրքիոյ իշխանութիւնները Վանի մէջ արգիլեցին ցոյցերը: Որոշումը ի զօրու պիտի ըլլայ մինչեւ 11 նոյեմբեր:

Եւրոպական Միութեան արտաքին քաղաքականութեան բարձրագոյն յանձնակատար Ֆետերիքա Մոկերինի երէկ յայտարարեց. «Խորապէս մտահոգուած եմ Սելահեթթին Տեմիրթաշի եւ Ժողովուրդներու ժողովրդավարական կուսակցութեան միւս երեսփոխաններուն ձերբակալութեամբ: Կապի մէջ եմ իշխանութիւններուն հետ: Անգարայի մէջ Եւրոպական Միութեան դեսպանները հրաւիրած եմ հանդիպումի»:

Յայտնենք, որ թրքական իշխանութիւնները երէկուընէ ի վեր Թուրքիոյ տարածքին արգիլած են ընկերային հաղորդակցութեան ցանցերը` «Թուիթըր», «Ֆէյսպուք», «Ուաթս Ափ» եւ այլն:

�