12 Kasım 2016
10 նոյեմբերին Շարժայի կառավարիչ շէյխ Սուլթան պըն Մոհամետ ալ Քասիմիի հետ հանդիպման ընթացքին Հայաստանի նախագահ Սերժ Սարգսեան նշած է, որ Շարժայի շէյխին կողմէ Հաղարծինի համալիրի նորոգութիւնը միջկրօնական երկխօսութեան լաւագոյն դրսեւորում էր:
Հայաստանի նախագահը բարձր գնահատած է Շարժայի կառավարիչ շէյխին անձնական մեծ ներդրումը շարք մը մարզերու մէջ` Հայաստան-Միացեալ Էմիրութիւններ յարաբերութիւններն ու փոխադարձ գործակցութիւնը խորացնելու առումով:
Նախագահ Սերժ Սարգսեան շնորհակալութեամբ անդրադարձած է շէյխին անմիջական աջակցութեամբ Հաղարծինի վանական համալիրի հիմնովին վերանորոգութեան ու համալիրին կից վանատան կառուցման` ընդգծելով, որ տարիներ առաջ շէյխին Հայաստան կատարած այցելութիւնը իր կարեւոր դրոշմը ունեցած է երկու երկիրներու յարաբերութիւններուն մէջ, եւ վերոնշեալ օրինակելի ու աստուածահաճոյ քայլը միջկրօնական երկխօսութեան եւ հանդուրժողականութեան լաւագոյն դրսեւորում էր:
Նախագահը գնահատելի նկատած է նաեւ Շարժայի մէջ Հայաստանի առեւտրատնտեսական կեդրոն բանալու առումով շէյխ Սուլթան պըն Մոհամետ ալ Քասիմիի ունեցած անմիջական դերակատարութիւնը եւ երկկողմանի առեւտրատնտեսական յարաբերութիւններու զարգացման ու հետագայ խորացման տեսանկիւնէն շատ կարեւոր նկատած է այդ քայլը: Նախագահ Սերժ Սարգսեան նշած է, որ կեդրոնը իր առաւել աշխուժ գործունէութեամբ պիտի նպաստէ երկկողմանի տնտեսական կապերու զարգացման:
Զրուցակիցները համակարծիք եղած են այն մասին, որ երկու բարեկամ երկիրներուն միջեւ հաստատուած ուղիղ թռիչքներուն առաջինը Շարժա-Երեւան-Շարժա ուղեւորութիւնն էր, որուն ներկայ պարբերականութիւնը խօսուն կերպով կը վկայէ փոխադարձ հետաքրքրութեան յաւելման մասին:
Շարժայի կառավարիչ շէյխին հետ հանդիպման ընթացքին Հանրապետութեան նախագահը խօսած է նաեւ Արաբական Միացեալ Էմիրութիւններու ներդրումային եւ զարգացման տարբեր հիմնադրամներուն հետ յարաբերութիւնները աշխուժացնելու Հայաստանի փափաքին մասին, որուն իրագործման նպատակով արդէն կարգ մը պայմանաւորուածութիւններ ձեռք բերուած են այցելութեան ծիրին մէջ: