Պոլսոյ Հայոց պատրիարքական փոխանորդ Արամ արք․ Աթէշեանի եւ տեղապահի ընտրութիւններուն յաղթած Գերմանիոյ Հայոց թեմի առաջնորդ Գարեգին արք․ Պեքճեանի հանդիպումը դրական արդիւնք չէ տուած: Ըստ «Արմենփրես»-ի՝ տեղեկացուցած է «Ակօս» պարբերականի հայերէն բաժնի պատասխանատու խմբագիր Բագրատ Էսդուգեան:

«Հանդիպումը կայացաւ Արամ Աթէշեանի, Գարեգին Պեքճեանի եւ երկու ոչ եկեղեցականներու մասնակցութեամբ: Արամ Աթէշեան ըսած է, որ թէեւ Գարեգին Պեքճեան ընտրուած է տեղապահ, ինք իր լիազօրութիւնները չի կրնար փոխանցել: Ան յայտնած է, որ Գարեգին Պեքճեան, որպէս տեղապահ, թող ընէ, ինչ կրնայ: Պարզ է, որ Գարեգին Պեքճեան բոլոր լիազօրութիւնները չի ստանձներ: Եթէ ան գործելու կարողութիւն չունի, հրահանգներ չի կրնար տալ, հետեւաբար չի կրնար պատրիարքի ընտրական գործընթացը նախապատրաստել»,- ըսած­ է Բագրատ Էսդուգեան:

Անոր խօսքով, Ապրիլ 1­-ին Սթամպուլի փոխնահանգապետին հետ հանդիպման ժամանակ նշուած է, որ Ապրիլ 16-­ին կայանալիք հանրաքուէէն ետք պիտի անդրադառնան պատրիարքի ընտրութիւններու գործընթացին: Թէ ի՞նչ քայլեր պիտի ձեռնարկէ Գարեգին Պեքճեան` դեռ պարզ չէ:

Բագրատ Էսդուգեան նշած է, որ յառաջիկայ ընելիքներուն մասին դեռ տեղեկութիւն չկայ: Ան փոխանցեց, որ Գարեգին Պեքճեան վերադարձած է Ապրիլ 2­ին: Նախատեսուած էր, որ Հրաշափառի արարողութիւնով ան պէտք է մուտք գործեր Մայր եկեղեցի: Նախորդ օրերուն Արամ սրբազանը բոլոր քահանաներուն լուր տուած էր` արգելելով մասնակցիլ արարողութեան: Նոյնիսկ փորձած են եկեղեցւոյ դռները փակել: «Եկեղեցու դռները բացուեցան, երբ եկան Գարեգին Պեքճեանը եւ Սահակ Մաշալեանը: Նախատեսուած արարողութիւնը չեղաւ, միայն աղօթք հնչեց: Մեր եկեղեցւոյ համար բաւական դժբախտ օրեր կ՛ապրինք, պատմութեան մէջ ամօթով յիշուելու արժանի օրեր կ՛ապրինք»,- ըսած է­ Բագրատ Էսդուգեան: