Հայաստանի Հանրապետութեան նախագահ Սերժ Սարգսեան շնորհաւորական ուղերձ յղած է Հայաստանի եզիտի համայնքի Նոր տարուան` Մալաքէ Թաուսի առիթով: Այս մասին կը հաղորդեն Հայաստանի նախագահի աշխատակազմի հասարակութեան եւ տեղեկատուութեան միջոցներու հետ կապերու վարչութենէն:

Շնորհաւորական ուղերձին մէջ ըսուած է.

«Հայաստանի եզիտի համայնքի սիրելի՛ ներկայացուցիչներ,

Ջերմօրէն կը շնորհաւորեմ ձեզ Նոր տարուան` Մալաքէ Թաուսի առիթով:

Հայ եւ եզիտի ժողովուրդներուն բարեկամութիւնը ունի դարերու պատմութիւն: Ապրելով կողք-կողքի` մենք կուտակած ենք համագործակցութեան, եղբայրութեան եւ միացեալ պայքարի հարուստ փորձ: Ներկայ սերունդներու պարտականութիւնն է այդ հարստութիւնը խնամքով փոխանցել յաջորդ սերունդներուն:

Մեր ցաւն ու ուրախութիւնը ընդհանուր են: Եւ այսօր մեծ ոգեւորութեամբ մենք կը միանանք ձեր ուրախութեան: Թող այս Նոր տարին Հայաստանի եզիտիներուն համար ըլլայ խաղաղութեան, երջանկութեան եւ բարեկեցութեան տարի:

Ձեզի կը մաղթեմ նոր ձեռքբերումներ եւ ամենայն բարիք:

Շնորհաւոր Մալաքէ Թաուս»: