Միացեալ Նահանգներու պաշտպանութեան նախարար Ճէյմս Մաթիս ամերիկեան «Սի.Պի.Էս.» պատկերասփիւռի կայանին հետ հարցազրոյցի մը ընթացքին յայտնած է, որ իր երկրին ղեկավարած միջազգային դաշինքը փոխած է ՏԱՀԵՇ-ի դէմ պայքարի մարտավարութիւնը:

«Մենք արդէն հրաժարած ենք յոգնեցնող մարտավարութենէն, ուր մենք ստիպուած ենք հակահարուած տալ անոնց անգամ մը այս, անգամ մը այն դիրքին` Իրաքի եւ Սուրիոյ մէջ: Կ՛անցնինք ոչնչացման մարտավարութեան, ուր զանոնք կը շրջափակենք», ըսած է Մաթիս:

Ըստ Փենթակոնի ղեկավարին, Միջազգային դաշինքը մտադիր է ՏԱՀԵՇ-ի զինեալներուն չարտօնել այլ երկիրներէ վերադառնալ տուն: Փենթակոնի ղեկավարը անգամ մը եւս նշած է, որ շրջափակման ճիշդ այս մարտավարութիւնը հիմնական պիտի դառնայ Միջազգային դաշինքին համար: