Տիարպեքիրի դատարանը Թուրքիոյ քրտամէտ Ժողովուրդներու ժողովրդավարական կուսակցութեան պատգամաւոր Օսման Պայտեմիրը կալանաւորելու մասին որոշում տուած է: Այս մասին կը յայտնէ թրքական «Միլիէթ» պարբերականը:

Պայտեմիր կը մեղադրուի Տիարպեքիրի քաղաքապետ ըլլալու ժամանակ` 2012-ին նահանգապետարանի դիմաց ոստիկաններ վիրաւորելու մէջ: Ան նահանգապետարան գացած էր խումբ մը պատգամաւորներու հետ` բողոքելու, որ իրենց արգիլած են ցոյց իրականացնել Պաթըքենթ հրապարակին վրայ:

Դատախազը պահանջած է անոր 1-3 տարուան բանտարկութեան դատապարտել:

Օսման Պայտեմիր Տիարբեքիրի քաղաքապետ եղած ժամանակ քանի մը անգամ ներողութիւն խնդրած էր Հայոց ցեղասպանութեան համար, ինչպէս նաեւ աջակցած է Տիարպեքիրի հայկական Սուրբ Կիրակոս եկեղեցւոյ վերանորոգման աշխատանքներուն:

Ան 2014-ին եկած էր Հայաստան, այցելած Ծիծեռնակաբերդ ու ծաղիկներ խոնարհած Անմար կրակին մօտ: