Երէկ Սուրիոյ մայրաքաղաք Դամասկոսը ցնցեցին երեք պայթումներ, որոնցմէ երկուքը ապահովական մարմիններու ջանքերուն շնորհիւ չհասան իրենց թիրախներուն, սակայն երրորդը պատճառեց զոհեր ու վիրաւորներ:

«Մայատին» արբանեակային պատկերասփիւռի կայանը կը հաղորդէ, որ ապահովական մարմինները յաջողած են թիրախազերծել Դամասկոսի ճարտարագիտական շրջանին մէջ երկու ականուած ինքնաշարժներ եւ կանխարգիլած անոնց քաղաք մուտքը, սակայն ականուած ինքնաշարժով երրորդ գործողութեան պատճառով Դամասկոսի Թահրիր հրապարակին վրայ արձանագրուեցան բազմաթիւ զոհեր եւ վիրաւորներ:

Սուրիոյ պետական պատկերասփիւռի կայանը հաղորդեց, որ երեք ականուած ինքնաշարժներու պայթումին պատճառով նախնական տուեալներով արձանագրուած է 8 զոհ եւ 12 վիրաւոր: «Նաշրա» կայքը աւելի ուշ հաղորդեց, որ զոհերուն թիւը բարձրացած է 19-ի: