Յուղարկաւորութիւն և թաղման կարգ Գերպծ. Մանուէլ Եպս. Պաթագեանի - Հայերէն
30 Kasım 2021 - Հակական տոմար - Տարի : 4514 / Ամիս : Տրե / Օր : Գիշերավար / Ժամ : Երկրատես

Հայերէն :

24 Ekim 2021  

Յուղարկաւորութիւն և թաղման կարգ Գերպծ. Մանուէլ Եպս. Պաթագեանի -

Յուղարկաւորութիւն և թաղման կարգ Գերպծ. Մանուէլ Եպս. Պաթագեանի Յուղարկաւորութիւն և թաղման կարգ Գերպծ. Մանուէլ Եպս. Պաթագեանի

Զմմառու Ցաւագին Տիրամօր բարեխօսութեամբ աղօթք կը բարձրացնենք առ Ամենաբարին Աստուած, որպէսզի երջանկայիշատակ Մանուէլ եպիսկոպոս Պաթագեանին հոգւոյն յաւիտենական հանգիստ շնորհէ, խնդրելով Աստուծմէ, որ իրեն նման եկեղեցասէր և ազգասէր հայորդիներ պարգեւէ Միաբանութեանս, ի սպաս Հայ Եկեղեցւոյ և Հայ Ազգի:Ողջոյ՝յն քեզ Սուրբ Եկեղեցի,

Ողջո՝յն քեզ սեղան սրբութեան:

Ողջո՝յն ձեզ դասք քահանայութեան:

Ողջո՝յն ձեզ հաւատացեալ եղբարք իմ ի Քրիստոս:

Ես ճանապարհորդեցի առ Արարիչն իմ:

Ուրբաթ 22 Հոկտեմբեր 2021-ին, կէսօրէ առաջ ժամը 11:00-ին լուսահոգի Գերապայծառ՝ Հ. Մանուէլ Եպիսկոպոսի յուղարկաւորութիւն և թաղման կարգը կատարուեցաւ Զմմառու մայրավանքի մայր տաճարին մէջ: Հայ Կաթողիկէ Եկեղեցւոյ կղերական դասը, գլխաւորութեամբ՝ նորընտիր Տանն Կիլիկիոյ Կաթողիկէ Հայոց Կաթողիկոս Պատրիարքի՝ Տէր Ռաֆայէլ Պետրոս ԻԱ. Կաթողիկոս Պատրիարքին, համախմբուած էր հոգելոյս Գերապայծառի դագաղին շուրջ, վերջին յարգանքի տուրքը մատուցանելու համար, որ երկար տարիներ ծառայած էր իբրեւ բարի, քաջարի, անձնուէր ժողովրդապետ և հովիւ:

Յուղարկաւորութեան և թաղման կարգին իրենց մասնակցութիւնը բերին Ս. Աթոռի Առաքելական Նուիրակի Քարտուղար, Լիբանանի Հայոց Առաջնորդ՝ Գերշն. Շահէ Եպս. Փանոսեան, Պէյրութի Հ. Կ. Թեմի Օգնական եպիսկոպոս՝ Արհի. Հ. Գէորգ Եպս. Ասատուրեան, Պէյրութի Հ. Կ. Թեմի Պատրիարքական Փոխանորդ և Զմմառու Պատրիարքական Կղերի Միաբանութեան Փոխանորդ և վանքի Մեծաւոր՝ Հ. Գաբրիէլ Թ.Ծ.Վ. Մուրատեան, Հալէպի Հ. Կ. Թեմի Առաջնորդ՝ Տէր Պետրոս Արք. Մրիաթեան, Թուրքիոյ Հ. Կ. Թեմի Առաջնորդ՝ Հ. Լեւոն Արք. Զէքիեանի ներկայացուցիչ Գեր. Վարդան Վրդ. Գազանճեան Մոսկուայէն և Երեւանէն ժամանած Թեմական Հայրեր և հոգեւորականներ, Անարատ Յղութեան Միաբանութեան Առաքինազարդ Մեծաւոր Մայր՝ Ք. Արուսեակ Սաճոնեան և առաքինազարդ քոյրեր, Լիբանանի Հ. Կ. Կղերական դասը, Գերապայծառ հօր քոյրը, քրոջ զաւակները եւ հարազատները, ինչպէս նաեւ սգակիր հաւատացեալներ:

Յուղարկաւորութիւնը սկսաւ Սուրբ և Անմահ Պատարագով, զոր մատոյց Ամենապատիւ և Գերերջանիկ Հոգեւոր Տէրը վանքին մայր տաճարին մէջ: Հանգուցեալ Գերապայծառին դամբանականը կատարեց Զմմառու Պատրիարքական Կղերի Միաբանութեան Պատրիարքական Փոխանորդ և վանքի Մեծաւոր՝ Հ. Գաբրիէլ Թ.Ծ.Վ. Մուրատեան, որ ըսաւ.

Աստուծոյ խոնարհ ծառան և բարի Հովիւը, որ աշխարհ եկած էր միայն ծառայելու համար իր հովուութեան յանձնուած հօտին։ Այս ճշմարտութիւնը կը վկայեն՝ զինք հեռուէն կամ մօտէն բոլոր ճանչցողները եւ անոր բարիքները վայելողները: Արդարեւ, ո՛չ մէկ հանգամանք եւ ո՛չ մէկ պատիւ զինք իր ծառայասիրութենէն հեռացուցին։ Իր առանձնայատկութիւններէն մէկը եղաւ լուռ աշխատանքը։ Ասով յատկանշուեցաւ իր ամբողջ եկեղեցական կեանքն ու գործունէութիւնը, զոր ծաւալեց լուսարձակներէ հեռու, թէ՛ Լիբանանի և թէ՛ արտերկրի մէջ։

Այսպիսին էր Արհի. Գերապայծառ Պաթագեան, որ խոր ծերութեան մէջ շիջեցաւ եւ առ յաւէտ մեկնեցաւ Երկնաւոր Հօր միանալու, Երկուշաբթի 18 Հոկտեմբեր 2021-ին:

Արհի. Գերապայծառը այսօր մեկնելով մեզմէ՝ կը թողու յիշատակ մը անթառամ և պատգամ մը կենսունակ. որ է՝ «Ծառայել Քրիստոսի սուրբ Եկեղեցւոյն ամենայն խոնարհութեամբ»:

Արդարեւ, մինչեւ մահուան նախօրեակը՝ ան նուիրուած էր մտաւոր և գրաւոր աշխատանքի, փոքր աղօթագիրքի, Հայ Եկեղեցւոյ ծիսարան – Մաշտոցի, Նոր Կտակարանի և Սաղմոսարանի աշխարհաբար թարգմանութեան վսեմագոյն գործին: Ալեզարդ Գերապայծառ Հայրը թէեւ թեւակոխելու վրայ էր իր արդիւնաւոր կեանքի 92-րդ տարին, սակայն միշտ թարմ մնացած էին անոր յիշողութիւնն ու ստեղծագործական ոգին: Միա՛յն յառաջացած տարիքը արգելք հանդիսացաւ անոր ծառայասիրութեան թափը կասեցնելու։

Եկեղեցւոյ կարգի աւարտին՝ հոգեւորական դասի առաջնորդութեամբ՝ բոլոր ներկաները ուղղուեցան դէպի Միաբանութեան դամբարանը, ուր գերեզմանատան կարգը կատարուեցաւ եւ հանգուցեալ գերապայծառին մարմինը ամփոփուեցաւ, Զմմառու վանքի միաբանութեան լուսահոգի միւս հոգեւորականներու կողքին:

Արարողութենէն ետք ցաւակցութիւններ ընդունուեցան դպրեվանքի դահլիճին մէջ:

Զմմառու Ցաւագին Տիրամօր բարեխօսութեամբ աղօթք կը բարձրացնենք առ Ամենաբարին Աստուած, որպէսզի երջանկայիշատակ Մանուէլ եպիսկոպոս Պաթագեանին հոգւոյն յաւիտենական հանգիստ շնորհէ, խնդրելով Աստուծմէ, որ իրեն նման եկեղեցասէր և ազգասէր հայորդիներ պարգեւէ Միաբանութեանս, ի սպաս Հայ Եկեղեցւոյ և Հայ Ազգի:

Խունկ և բիւր օրհնութիւն Հոգելոյս և վաստակաշատ Գերապայծառին անմահ և պայծառ յիշատակին:








Bu haber vaticannews kaynağından gelmektedir.

Haber metninde yer alan görüşler haber kaynağı (vaticannews) ve yazarına ait olup,
bolsohays.com sitesi haber hakkında herhangi bir görüş üstlenmemektedir.

Opinions expressed are those of the author(s)-(vaticannews). They do not purport to reflect the opinions or views of bolsohays.com
+