Գահիրէի մէջ միջնորդները յայտնեցին, որ կը շարունակեն իրենց ջանքերը փրկելու Միացեալ Նահանգներու միջնորդութեամբ գոյացած զինադադարը, որ վերջ տուաւ մեծ բախումներուն, սակայն շարք մը կարեւոր հարցեր առանց լուծումի ձգեց։ Այս մասին կը հաղորդէ «Արապիա»-ն։

Իսրայէլ եւ Համաս շարժումը շարունակ զիրար կ՛ամբաստանեն զինադադարը խախտելու ամբաստանութեամբ։

Կազայի մէջ գործող առողջապահութեան ոլորտի պաշտօնատարներ կը յայտնեն, որ իսրայէլեան օդային յարձակումները զինադադարին ուժի մէջ մտնելէն ի վեր աւելի քան 950 զոհ պատճառած են, մինչ Իսրայէլ կ՛ըսէ, թէ նոյն ժամանակաշրջանին իր զինուորներէն չորսը սպաննուած են զինեալներու կողմէ։

Իսրայէլեան ուժերը տակաւին Կազայի աւելի քան 60 առ հարիւրին կը վերահսկեն։

Կազայի հարաւի շրջանէն ականատեսներ «Արապիա»-ին յայտնած են, որ իսրայէլեան ուժերը վերջին օրերուն Խան Եունեսէն արեւելք եւ Ռաֆահէն հիւսիս գտնուող կարգ մը շրջաններու մէջ ընդլայնած են «դեղին գօտի»-ն։

Համասէն պաշտօնատար մը «Ռոյթըրզ» լրատու գործակալութեան յայտնած է, որ Իսրայէլ կը մերժէ Կազայի մէջ քաղաքայիններու վրայ յարձակումները դադրեցնել, ինչպէս նաեւ կը մերժէ, որ օժանդակութիւններով բեռցուած 600 բեռնակառքեր մուտք գործեն Կազա, ինչպէս համաձայնութիւնը կը նշէ, «եւ տակաւին ամէն օր յաւելեալ հողեր կը բռնագրաւէ»։