Ռուսիոյ եւ Ազրպէյճանի նախագահներ Վլատիմիր Փութինն ու Իլհամ Ալիեւը երէկ հեռաձայնային հաղորդակցութիւն ունեցած են: Այս մասին հաղորդեց Քրեմլինի մամլոյ ծառայութիւնը:

«Քննարկելով երկկողմանի եւ միջազգային օրակարգի հրատապ նիւթերը, ղեկավարները ընդգծած են ռուս-ազրպէյճանական յարաբերութիւններու կառուցողական բնոյթը եւ կառավարութիւններու ու առաջնակարգ գերատեսչութիւններու մակարդակի վրայ երկխօսութեան աշխուժացումը:

«Կողմերը հաստատած են փոխշահաւէտ համագործակցութեան հետագայ ընդլայնման տրամադրուածութիւնը», նշուած է Քրեմլինի հաղորդագրութեան մէջ:

«Ազատութիւն» ձայնասփիւռի կայանը կը նշէ, որ Ռուսիոյ նախագահի աշխատակազմը չի յստակացներ, թէ հեռաձայնային հաղորդակցութիւնը որո՛ւ նախաձեռնութեամբ կայացած է: Ալիեւ եւ Փութին զրուցած են Ռուսիոյ նախագահին եւ Հայաստանի Հանրապետութեան վարչապետին միջեւ հեռաձայնային հաղորդակցութենէն մէկ օր ետք:

Փութին-Փաշինեան զրոյցը տեղի ունեցած էր հայկական կողմին նախաձեռնութեամբ: